Lajme Kosovë

Radio Dukagjini përkujton 10 vjetorin e ndarjes nga jeta të drejtorit Riza Lluka

Para 2 muajve

Sot shënohet 10-vjetori i vdekjes së Riza Llukës. Veprimtarit të njohur të çështjes kombëtare, humanistit dhe patriotit të shquar, njeriut që një jetë ia kushtoi atdheut e kombit.

Me 23 mars të vitit 1989, në Kuvendin e Krahinës Socialiste Autonome të Kosovës në kundërshtim me vullnetin e qytetarëve do të ndryshohej Kushtetuta e vitit 1974 me çka suprimohej autonomia e Kosovës në federatën Jugosllave, duke e lënë atë si pjesë përbërëse të Serbisë.

Njëri prej delegatëve të Kosovës ishte Riza Lluka, një përfaqësues i denjë i popullit.

Atë ditë ishin të pranishëm edhe shumë njerëz të tjerë, përveç delegatëve, të cilët tregonin qartë për vendimet antishqiptare që do merreshin atë ditë.

Nga foltorja e Kuvendit, Riza Lluka kërkoi që të ndalohet votimi i këtyre “mysafirëve”, e që të merret parasysh vetëm vullneti i delegatëve, por fatkeqësisht kjo nuk u arrit.

Rëndësia e kësaj seance u kuptua edhe nga prania e gjithë atyre gazetarëve nga vende të ndryshme të botës të cilët kishin raportuar edhe për fjalimin e Riza Llukës në foltore, e cila më pas pati jehonë të madhe.

Imazhi i deputetit Lluka duke ngritur gishtat kundër ndryshimeve, simbolizon rezistencën dhe përfaqësimin e vullnetit të shqiptarëve shumicë të Kosovës.

Kjo shihet edhe në xhirimet e publikuara nga mediat ndërkombëtare.

Riza Lluka do mbahet mend edhe si misionar në pajtimin e gjaqeve në SHBA, në krye me Anton Çetën gjatë viteve të nëntëdhjeta.

Ishte njohës i mirë i kulturës dhe historisë, andaj edhe bëri përpjekje të njëpasnjëshme për zbardhjen dhe ruajtjen e fakteve dhe dëshmive historike.

Ai ishte deputet i Kuvendit të Republikës së Kosovës, në kuadër të institucioneve paralele, por atëherë si anëtar i Partisë Parlamentare përgjatë viteve 1992-1998.

Riza Lluka i kushtonte kujdes të veçantë arsimit, studentëve, stimulimin të tyre përmes angazhimit të strukturave të qeverisë dhe aktivizimit të gjitha resurseve vendore e ndërkombëtare që të gjenden mjetet për plotësimin e këtyre nevojave.

Pas luftës sikurse i gjithë vendi, edhe qyteti i Pejës ishte shkatërruar.

Çdo lagje kishte shtëpi e dyqane të djegura.

Edhe këtu Riza Llukën e gjejmë të angazhuar në rimëkëmbjen e qytetit të tij të lindjes.

Pas kësaj periudhe punoi si këshilltar i lartë profesional në Korporatën Dukagjini, ku më pas themeloi dhe udhëhoqi radion dhe televizionin Dukagjini.

Humanizimi i tij vërehej në çdo hap që bënte. Këtë e dëshmoi edhe në momentin më të duhur, atëherë kur në Pejë u hap kuzhina humanitare nga shoqata “Jetimat e Ballkanit”.

Hapja e shkollës së vetme të baletit në Pejë është një tjetër meritë e Riza Llukës.
Pra, ai kishte vizion dhe çdo gjë të mirë që donte, donte ta kishte edhe qyteti i tij i lindjes, Peja.

Shkollën fillore e kreu në vendlindje, ndërsa në Prizren përfundoi arsimimin në drejtimin e arkitekturës dhe ishte njëri ndër të parët të kualifikuar të kësaj fushe.

U punësua në një ndërmarrje ndërtimore, një ndërmarrje e njohur e kohës brenda dhe jashtë vendit.

Aty tregoi gjithë profesionalizimin e tij duke qenë ideator i shumë projekteve të mëdha.

Më 25 nëntor 2014, pas një beteje, me një sëmundje të rëndë Riza Lluka ndërroi jetë në moshën 71-vjeçare dhe deri në ditët e fundit të jetësishte në krye të RTV Dukagjinit në detyrën e drejtorit.