Çfarë fshihet pas uljeve të mëdha dhe si na mashtrojnë mekanizmat e marketingut
Black Friday është krijuar që të na zgjojë ndjenjën e urgjencës, euforisë dhe frikës së humbjes së një oferte. Sa herë na ka gëzuar një ulje e madhe, duke menduar se kemi “kapur” ofertën e vitit? Dhe sa herë më vonë kemi kuptuar se ajo blerje nuk ka qenë aq e favorshme? Pas pankartave që shkëlqejnë me zbritje të mëdha fshihet e gjithë një psikologji e konsumit dhe disa truke që tregtarët nuk duan t’i dimë.
Çmimet e rreme dhe fillimi i hershëm i uljeve
Shumë ulje të Black Friday nuk janë të vërteta. Praktika e njohur si price anchoring funksionon kështu: tregtarët rrisin çmimet disa javë më parë dhe më pas i “ulin” në vlerën e vjetër, duke e paraqitur këtë si super-ofertë. Po ashtu, Black Friday nis shumë më herët nga sa mendojmë, me “ulje të hershme” që fillojnë që në tetor. Këto teknika kanë vetëm një qëllim: të krijojnë përshtypjen se momenti ideal për blerje është tani, edhe kur çmimet reale nuk ndryshojnë.
Ofertat “magnetike” dhe modelet e dobëta për Black Friday
Ato çmimet marramendëse për televizorë, laptopë apo pajisje të tjera shpesh ekzistojnë në sasi shumë të vogla. Qëllimi është thjesht të na fusin në dyqan, me adrenalinën gati për të blerë gjithçka tjetër. Për më tepër, shumë pajisje që shiten ekskluzivisht për Black Friday janë versione të prodhuara posaçërisht për këtë ditë - me komponentë më të lirë, duke përfshirë ekrane më të dobëta, procesorë më të ngadaltë dhe më pak porta, edhe pse duken identikë me modelet standarde.
Minutat që na nxitin të blejmë - mungesa e sasive dhe presioni psikologjik
“Të mbetën edhe 3 copë!”, “Oferta përfundon për 05:27!”, “Po shitet me shpejtësi!” - mesazhe të tilla shfrytëzojnë ankthin tonë për të mos humbur një mundësi. Shumë prej tyre janë artificiale: tajmerët rivendosen sapo rifreskohet faqja, ndërsa paralajmërimet për sasi të kufizuara shpesh janë të ekzagjeruara. Qëllimi i tyre është të na tërheqin drejt një vendimi impulsiv, para se të mendojmë, transmeton Telegrafi.
Blerjet shtesë dhe manipulimi online
Black Friday nuk është krijuar që të blejmë një produkt, por disa. Fitimi më i madh i tregtarëve vjen nga shtesat: aksesorë, garanci, oferta “blej 2 - i treti falas” dhe artikuj pranë kasës. Çmimet online ndryshojnë sipas sjelljes sonë: sa më shumë ta kërkojmë një produkt, aq më shumë rritet mundësia që çmimi të ndryshojë, ulja të zvogëlohet ose të na paraqitet një “ofertë e rreme urgjente”.
Miti i çmimeve më të ulëta dhe iluzioni i kursimit
Një nga mitet më të mëdha është se Black Friday ka çmimet më të ulëta të vitit. Shpesh, uljet e janarit janë shumë më të mëdha, sidomos për elektronikën, pajisjet shtëpiake dhe veshmbathjet. Megjithatë, psikologjia e Black Friday na shtyn të besojmë se po bëjmë marrëveshjen e shekullit – ndërkohë që shpesh vetëm po shpenzojmë më shumë se zakonisht. Efekte si adrenalina, FOMO, humbja e gjykimit racional dhe përqindjet e mëdha të shkruara me shkronja të ndezura ndikojnë drejtpërdrejt në vendimet tona.
Si të mbrojmë veten dhe çfarë thotë psikologjia
Mbrojtja më e mirë është ndërgjegjësimi: të ndjekim çmimet paraprakisht, të mos i besojmë tajmerëve, të blejmë sipas listës, të krahasojmë çmimet reale dhe të marrim parasysh edhe uljet e janarit.
Psikologët theksojnë se blerjet impulsive rrisin përkohësisht dopaminën, por më pas sjellin stres dhe ndjenjë humbjeje kontrolli. Një pauzë prej 30 sekondash mjafton për të qetësuar impulsin dhe për të marrë vendim të matur.
A e kuptojmë tani më qartë si funksionon Black Friday dhe a do të blejmë më me mend herën tjetër? /Telegrafi/
