Pse është shumë vështirë “i arritshëm” Titaniku?

Zhdukja e nëndetëses turistike Titan gjatë një ekspedite në rrënojat e Titanikut ka ngritur pikëpyetje rreth rreziqeve të përfshira në një rrugëtim të tillë në thellësi.

Bëhet fjalë për një ngjarje nga e cila tanimë thuhet se kanë vdekur pesë persona të gjendur në të, përcjell Telegrafi.

Nëndetësja Titan që ishte zhdukur prej ditësh në Oqeanin Atlantik me pesë burra në bord pësoi një “humbje katastrofike” që supozohet se erdhi pas “shpërthimit të anijes”, tha Roja Bregdetare e SHBA-së.

Historiku i Titanikut

Në një moment në vjeshtën e vitit 1911, një copë e madhe akulli u shkëput nga një akullnajë në jugperëndim të shtresës së madhe të akullit të Grenlandës.

Gjatë muajve në vijim, ajo copë akulli u zhvendos ngadalë në jug, duke u shkrirë gradualisht ndërsa u bart nga rrymat e oqeanit dhe era.

Lexo po ashtu “Kjo është ajo që kisha frikë kur mora telefonatën e parë": Eksperti i kërkimit flet pas lajmit për vdekjen e personave që ishin në nëndetësen e zhdukur në Oqeanin Atlantik

Më pas, në natën e ftohtë dhe pa hënë më 14 prill 1912, një ajsberg u përplas me anijen e pasagjerëve “Titanic” ndërsa bëri udhëtimin e saj të parë nga Southampton në Mbretërinë e Bashkuar në Nju Jork, SHBA.

Në më pak se tre orë anija ishte fundosur, duke dërguar më shumë se 1500 pasagjerë dhe anëtarë të ekuipazhit drejt vdekjes.

Rrënojat e saj tani shtrihen gati 3.8 kilometra nën valët e detit në një vend gati 640 kilometra në juglindje të bregut të Newfoundland.

Lexo po ashtu 'Mund të ketë shpërthyer nën presion të jashtëzakonshëm': Detaje të tjera që tregojnë se si nëndetësja mund të jetë zhdukur në Oqeanin Atlantik

Dhe ajsbergët ende përbëjnë një rrezik për transportin detar – në vitin 2019, 1,515 ajsbergë u zhvendosën aq larg në jug duke “u futur në korsitë transatlantike të transportit detar” gjatë muajve mars deri në gusht.

Por vendi “ku tanimë pushon” Titaniku mbart rreziqet e veta, që do të thotë se vizitat atje paraqesin një sfidë të rëndësishme.

Në këtë drejtim, me zhdukjen e një nëndetëseje me pesë persona ndërsa transportonte pasagjerë me pagesë në një udhëtim drejt mbetjeve të Titanikut, BBC ka sjellë një shkrim ku tregon se si është ky “rajon i dyshemesë së oqeanit”.

Lundrimi në thellësi

Sipas shkrimit të BBC, përcjell Telegrafi, thellësia e oqeanit është e errët. Drita e diellit absorbohet shumë shpejt nga uji dhe nuk është në gjendje të depërtojë shumë më thellë se rreth 1,000 metra nga sipërfaqja.

Përtej kësaj pike, oqeani është në errësirë të përhershme.

Dhe Titaniku shtrihet brenda një rajoni të njohur si “zona e mesnatës” pikërisht për këtë arsye.

Ekspeditat e mëparshme në vendin e mbytjes kanë përshkruar zbritjen për më shumë se dy orë përmes errësirës totale përpara se fundi i oqeanit të shfaqet papritur nën dritat e zhytëses.

Me vijën e kufizuar të shikimit përtej pak metrave të ndriçuar nga dritat e saj – të madhësisë së një kamioni – lundrimi në këtë thellësi është një detyrë sfiduese, duke e bërë të lehtë çorientimin në shtratin e detit.

Lexo po ashtu A ekziston mundësia të gjenden trupat e pesë turistëve të nëndetëses Titan?

Hartat e detajuara të vendit të mbytjes së Titanikut të bashkuara nga dekada të tëra skanimi me rezolucion të lartë, megjithatë, mund të ofrojnë “pika orientuese” kur shfaqen objektet.

Ndërkohë nëndetësja Titan e OceanGate supozohet se mbart një sistem lundrimi të teknologjisë së fundit.

Megjithatë, pasagjerët në bordin e udhëtimeve të mëparshme në Titanikun me OceanGate kanë përshkruar se sa e vështirë është të gjesh rrugën e tyre kur të arrish në fundin e oqeanit.

Mike Reiss, një shkrimtar i komedisë televizive i cili ka punuar në The Simpsons dhe mori pjesë në një udhëtim me OceanGate drejt Titanikut vitin e kaluar, i tha BBC-së: “Kur prekni fundin, nuk e dini vërtet se ku jeni. Na u desh të silleshim përreth verbërisht në fund të oqeanit, duke e ditur se Titaniku është diku atje, por është aq errët sa kaluam 90 minuta duke e kërkuar atë”.

Thellësi dërrmuese

Përveç atyre më lartë, shkrimi i BBC vë në pah faktin se sa më thellë që një objekt udhëton në oqean, aq më i madh rritet presioni i ujit rreth tij.

Në shtratin e detit 3,800 metra nën ujë, Titaniku dhe gjithçka përreth duron presione prej rreth 40 MPa, të cilat janë 390 herë më të mëdha se ato në sipërfaqe.

Lexo po ashtu Videot animatore të ndara në rrjet tregojnë se si mund të jetë dukur shpërthimi i nëndetëses Titan

“Për ta vënë atë në perspektivë, kjo është rreth 200 herë presioni i asaj që është në një gomë makine”, tregon Robert Blasiak, një studiues i oqeanit në Qendrën e Rezistencës së Stokholmit në Universitetin e Stokholmit, për programin “Today” të BBC Radio 4. “Kjo është arsyeja pse ju duhet një zhytës që ka mure vërtet të trasha”.

Dhe muret me fibra karboni dhe titan të zhytëses Titan janë projektuar për t’i dhënë asaj mundësinë e futjes në një thellësi maksimale funksionimi prej 4,000 metra.

Rrymat e poshtme

Rrymat e forta sipërfaqësore që mund të largojnë varkat dhe notarët janë ndoshta më të njohura për ne, por oqeani i thellë “fsheh” edhe rrymat nënujore.

Megjithëse zakonisht nuk janë aq të forta sa ato që gjenden në sipërfaqe, ato mund të përfshijnë ende lëvizjen e sasive të mëdha të ujit.

Ngjarjet e rralla të njohura si “stuhitë bentike” – të cilat zakonisht lidhen me vorbullat në sipërfaqe – mund të shkaktojnë gjithashtu rryma të fuqishme, sporadike që mund të “fshijnë” materialin në shtratin e detit. /Telegrafi/