Policia e Mbretërisë së Bashkuar përgatitet për trazira të mëtejshme të dhunshme pas sulmit me thikë në Southport

Policia e Mbretërisë së Bashkuar po përgatitet për trazira të mëtejshme të dhunshme pasi tre fëmijë u vranë në një sulm me thikë, duke shkaktuar një valë trazirash në të gjithë vendin.

Bëhet e ditur se dhjetë persona u arrestuan dhe katër oficerë policie u plagosën gjatë raundit të fundit të protestave të dhunshme në Sunderland, Anglinë verilindore.

Të arrestuarit po përballen me një sërë veprash, duke përfshirë vjedhje.

Ndërkohë, qindra protestues qëlluan me gurë policinë, mbanin në dorë pankarta me slogane anti-islame dhe shënjestruan xhamitë, skena këto që policia i quajti “plotësisht të papranueshme”.

Përplasjet e fundit vijnë disa ditë pasi shpërthyen protestat e dhunshme të së djathtës ekstreme në qytetin veriperëndimor të Southport, ku një i dyshuar adoleshent goditi për vdekje me thikë tre fëmijë të moshës nga gjashtë deri në nëntë vjeç.

Trazirat pritet të vazhdojnë këtë fundjavë, shkruan CNN, përcjell Telegrafi.

Lexo po ashtu Forcat policore në Angli rrisin patrullimet pasi demonstratat e dhunshme vazhdojnë pas sulmit me thikë

Sipas organizatës bamirëse kundër racizmit Hope Not Hate, deri në 35 protesta do të zhvillohen në të gjithë Mbretërinë e Bashkuar këtë fundjavë nën një “agjendë të gjerë anti-multikulturalizmi, anti-mysliman dhe anti-qeveritar”.

Organizata bamirëse shton se ngjarjet do të “ndryshojnë në madhësi dhe natyrë” dhe ndërsa disa mund të mos materializohen, të tjerat kanë potencialin të jenë të dhunshme.

Siç raportohet, policia ka rënë dakord të rrisë kapacitetet gjatë fundjavës.

Policia tha se besonte se turma në Southport doli në rrugë për shkak të raporteve të pakonfirmuara që spekulonin mbi identitetin e adoleshentit të dyshuar për therje me thikë.

Ndryshe, 17-vjeçari është paraqitur në Gjykatën e Liverpoolit dhe u emërua si Axel Rudakubana pasi një gjyqtar hoqi kufizimet e raportimit që zakonisht zbatohen për të miturit.

Ai është akuzuar për tre akuza për vrasje dhe 10 akuza për vrasje në tentativë, si dhe për posedim të një mjeti me teh. /Telegrafi/