Cristiano Ronaldo ka ende një shans që të ndihmojë Juventusin në përballjen e Ligës së Kampionëve ndaj Barcelonës.
Pesë herë fituesi i Topit të Artë rezultoi pozitiv në testimin e dytë të bërë në këtë javë për coronavirus, derisa mbetet në dyshime paraqitja e tij për Zonjën e Vjetër.
Sipas asaj që raporton The Sun, Juventusi ka informuar UEFA-n se lojtari është në gjendje të mirë dhe do të testojnë atë 24 orë para se të luhet takimi me Barcelonën.
Nëse rezultati i tretë del negativ, atëherë 35-vjeçari do të lejohet të luajë kundër skuadrës katalunase në të mërkurën e javës së ardhshme.
Juventusi është nikoqir i Barcelonës për takimin e parë në fazën e grupeve të Ligës së Kampionëve, mirëpo shpresat e tyre më të mëdha janë në rikthimin e Ronaldos.
Në anën tjetër, Lionel Messi ka thënë se ai shpreson që ta shoh portugezin në fushë, duke rikthyer edhe një herë rivalitetin e tyre të madh. /Telegrafi/
