“Plani i ëndrrave” – Modric zbulon se çfarë synon pas Botërorit

Luka Modric ka lënë të kuptohet se mund të tërhiqet nga futbolli së shpejti dhe pranoi se nuk është 100 për qind i sigurt se çfarë do të bëjë pas Kampionatit Botëror.

Mesfushori 37-vjeçar ka thënë se do të vendosë të ardhmen e tij pas turneut pasi aktualisht po përgatitet për ndeshjen gjysmëfinale të Kroacisë me Argjentinën.

Megjithatë, Modric tha se do të ishte një ëndërr të shihte karrierën e tij të përfundonte në Real Madrid – pasi u bashkua me Los Blancos në gusht të vitit 2012.

“Për momentin, jam në Kampionat Botëror dhe shumë i fokusuar te Kroacia”, ka thënë 37-vjeçari për Diario AS.

Modric vazhdoi duke shtuar: “Çfarë do të ndodhë më pas, le të shohim, ka kohë të mjaftueshme për të folur për gjithçka (pas Botërorit)”.

“Sigurisht që dua të pensionohem në Madrid, këtë e kam thënë shumë herë. Nuk mund të thuash asgjë për 100 për qind, por kjo është ideja ime dhe është një ëndërr për mua”, ka potencuar më tej ai.

Modric ka qenë vendimtar në suksesin e Kroacisë. Ai e udhëhoqi kombin e tij në finalen e Kupës së Botës në vitin 2018 në Rusi dhe madje fitoi Topin e Artë për lojtarin më të mirë gjatë turneut.

Modric u kurorëzua edhe fituesi i Topit të Artë pasi shkëlqeu në skenën ndërkombëtare dhe vendase në po atë vit. Ai mori çmimin e madh individual, duke mposhtur Cristiano Ronaldon dhe Antoine Griezmanin, ndërsa Lionel Messi doli i pesti. /Telegrafi/