Oscar Piastri dhe McLaren kanë siguruar një fitore të dyfishtë në Çmimin e Madh të Spanjës në Formula 1, duke e lënë Lando Norris në vendin e dytë dhe Charles Leclerc të Ferrarit në podium pas një gare të jashtëzakonshme.
Max Verstappen, i cili ishte mes tre më të mirëve në pjesën më të madhe të garës, përfundoi vetëm i dhjeti pas një penalizimi që e rrëzoi nga pozitat e para.
Piastri mbrojti me sukses pozicionin e parë në start, ndërsa Verstappen e parakaloi Norrisin për vendin e dytë, por nuk arriti ta ruajë këtë pozitë më shumë se 13 xhiro.
Red Bull zgjodhi strategjinë me tre ndalesa në bokse për Verstappen, përkundër McLaren dhe pjesës tjetër të pilotëve që ndaluan vetëm dy herë. Kjo e afroi Verstappenin me Piastrin dhe Norrisin, por nuk ishte e mjaftueshme për të kaluar më tej.
Kur kishin mbetur vetëm 11 xhiro, Kimi Antonelli nga Mercedes u detyrua të ndalte makinën jashtë pistës për shkak të një defekti, duke shkaktuar daljen e makinës së sigurisë.
Shumica e pilotëve vendosën goma të buta gjatë kësaj kohe, por Verstappen kishte vetëm goma të forta, duke e vështirësuar situatën për të. Pas rifillimit të garës, ai pati vështirësi dhe u përfshi në kontakte me Leclerc dhe Russell, që i kushtuan një penalizim prej dhjetë sekondash dhe e rrëzuan në vendin e dhjetë.
Nico Hülkenberg nga Sauber u rendit në vendin e pestë, duke kaluar në fund Lewis Hamiltonin.
Pas kësaj gare, Piastri kryeson renditjen e përgjithshme me një avantazh prej dhjetë pikësh ndaj Norrisit, ndërsa Verstappen është 49 pikë prapa. /Telegrafi/
