Përfundon drama e këtij sezoni, Feronikeli mposht konkurrencën e Prishtinës dhe shpallet kampion i Kosovës

Feronikeli është shpallur kampion i Ipko Superligës së Kosovës në futboll në sezonin 2018/2019 duke e mposhtur (1-0) konkurrentin e drejtpërdrejtë për titull, Prishtinën, në xhiron e fundit sezonale në kampionatin elitar vendor.

Në përballjen e zhvilluar në stadiumin “Rexhep Rexhepi” në Drenas, skuadrës nikoqire i mjaftonte barazimi për t’iu gëzuar titullit, derisa bardhekaltrit duhet doemos ta fitonin përballjen për të festuar.

Në mbështetje të madhe të tifogrupeve të të dyja klubeve dhe me ndarjen e drejtësisë nga gjyqtari Genc Nuza, supersfida filloi me 15 minuta vonesë.

Edhe pse ishte pritur që Feronikeli të zhvillonte lojë defensive, vendasit nuk e bënë këtë për zhvilluan lojë sulmuese duke i bërë presion kundërshtarit.

Rastin më të mirë në pjesën e parë e pati Mendurim Hoti, i cili nuk përfitoi nga një gabim i Visar Bekajt, derisa portieri i kryeqytetasve reagoi për ta përmirësuar gabimin e tij.

Një tentim për të shënuar e pati edhe Kastriot Rexha, megjithatë pjesa e parë u mbyll pa gola dhe pa ndonjë tentim për t’u përmendur të lojtarëve të Prishtinës.

As në gjysmën e dytë të takimit, bardhekaltrit nuk tregoheshin të rrezikshëm, madje nuk dërguan asnjë goditje brenda kuadratit të portës dhe në këtë mënyrë u ndëshkuan.

Një goditje e Yll Hoxhës që u duk të ishte harkim u ndal në rrjetën e portës së Bekajt (73′), teksa Albutrint Morina u përpoq ta devijonte topin.

Në minutat e mbetura, kryeqytetasit bënë përpjekje të shumta, mirëpo nuk arritën t’i ndryshonin gjërat në stadiumin “Rexhep Rexhepi”, ashtu që mbetën nënkampionë për të dytin vit radhazi.

Për Feronikelin, ky është titulli i tretë në histori, pas sukseseve të arritura në sezonet 2014/2015 dhe 2015/2016. /Telegrafi/