Përdorimi i Ozempikut për dobësim, çfarë thotë endokrinologu Spahija?

Endokrinologu Agron Spahija në podcastin “Shëndeti në rend të parë” ka folur edhe për barin e ri, Ozempik që përdoret për trajtimin e diabetit, por që ndikon edhe në rënien në peshë.

Spahija bëri të ditur se Ozempik është një bar i ri që përdoret për trajtimin e diabetit dhe është siç tha ai agonist i receptorëve për GLP 1 dhe GIP hormonet.

“… Këto hormone lirohen prej traktit digjestiv në momentin kur ne e marrim ushqimin dhe pastaj ato nxisin prodhimin e insulinës prej pankreasit dhe të njëjtën kohë shkaktojnë edhe një ndjenë të ngopjes që gjë ky frenim i marrjes së ushqimit i kontribuon edhe uljes së peshës.  Prandaj, si efekt anësor i këtyre medikamenteve është rënia e peshës”, tha ai.

Sipas tij, si të tilla këto barna u rekomandohen pacientëve, personave që kanë diabet, por njëkohësisht edhe personave që janë të rrezikuar të sëmuren nga sheqeri.

Ai shtoi se këtu hyjnë personat që janë obezë dhe në veçanti ata që e kanë rezistencë insulinike të rritur.

“Të gjithë ata pacientë janë obezë, mbipeshë dhe në analizat laboratorike gjejmë se kanë rezistencë insulinike munden me marr Ozempikun edhe pse nuk janë të diagnostikuar me diabet… Gjithsesi se nevojitet konsulta me endokrinolog”, tha doktori.

Sa i përket efekteve anësore afatgjata, ai tha se ende nuk dihen saktë pasi është një bari i ri, por personat që i përdorin ato mund të kenë vjellje, mundim etj.

Po ashtu sipas tij, personat që kanë probleme me gjëndra tiroide duhet të kenë kujdes.

Podcastin e plotë ku doktor Spahija flet për diabetin, problemet me gjëndra tiroide, stresin etj mund ta shikoni më poshtë. /Telegrafi/