‘Përballje Podcast’ sjell ekspertë për të diskutuar sfidat e dezinformatave në zgjedhje: Përvoja nga Kosova dhe mësimet për të ardhmen

Në episodin e dytë të sezonit të dytë në “Përballje Podcast” në Telegrafi.com është diskutuar për rëndësinë e verifikuesve të fakteve gjatë kohës së zgjedhjeve dhe rolin e rrjeteve sociale.

Rrjetet sociale janë mundësi për komunikim me qytetarët, por fatkeqësisht edhe për keqinformim. Gjatë periudhave zgjedhore, kjo dukuri bëhet edhe më e theksuar, duke ndikuar perceptimin publik dhe ndonjëherë edhe në rezultatin e zgjedhjeve.

Në këtë episod, është diskutuar për dezinformatat, rolin e platformave online si dhe hapat që mund të ndërmarrim për të ruajtur një diskurs të shëndetshëm dhe integritetin e procesit zgjedhor.

Kreshnik Gashi, kryredaktor në Kallxo.com ka deklaruar se në këto zgjedhje kemi një fushatë e cila në aspektin e komunikimit dhe në aspektin e përballjes ka shënu dhjetë hapa mbrapa.

“Pra nëse ne kemi pas një shtet të Kosovës i cili ka avansu shumë në demokracinë dhe në vlerat demokratike që imponohen për shkak të debatit të përballjes të verifikimit të fakteve etj, në këto zgjedhje kemi dhjetë hapa mbrapa për shkak se partia e cila është në pushtet – Lëvizja Vetëvendosje – ka vendos që me iu shmang debatit edhe me zhvillu fushatën pa pasë përballje me kundër-kandidatët”, ka deklaruar Gashi në “Përballje Podcast” me kryredaktorin e Telegrafit, Muhamet Hajrullahu.

Gashi ka potencuar edhe rrezikun dhe ndikimin që kanë rrjetet sociale në fushatën zgjedhore.

“Ne nuk e kishim pas problem nëse kishim pas liderët politikë, të cilët fushatën e kishin bërë mbi faktet, mbi të dhëna të sakta, mbi prova të sakta, mbi hulumtime të cilat i kishim pas në këtë drejtim. Fatkeqësisht, liderët tanë janë prodhues të dezinformatës, por ma e keqja ata shpeshherë janë viktima të dezinformatës. Ajo çka na duhet me konstatu është që edhe materialet shtetërore të Kosovës, edhe librat, edhe dokumentet zyrtare janë të stërmbushura me dezinformata. Ne kemi kontaminim masiv të informacionit të cilën na e publikojmë”, ka thënë ai.

Ndërsa Aurora Kingji, eksperte e mediave sociale ka thënë se si në çdo zhvillim tjetër, sidomos në rrjetet sociale, ka mënyra për mu përfitu prej saj e ka mënyra me u dëmtu prej saj.

“Rrjetet sociale përnjëmend janë prej sendeve më dinamike, mendoj që njërin prej konkurrencave të vetme e kanë politikën edhe median….Me vendimin e ri të META-s rrezikohet në një farë mënyre kjo që është shpërndarja e informatave të rrejshme, për shkak që tash ka me pasë njerëz, vullnetarë, të cilët kanë me i verifiku faktet… Arsyeja pse META ka mbërri në këtë ndryshim është se ka pas shumë ankesa në dëmtimin e efikasitetit të platformës, për shkak që prej ‘third-party kontributions’ që janë bërë për verifikimin e fakteve, studime të paktën që i ka ba META ka vërejtë se edhe ata njerëz i kanë bërë njëanshmëritë e veta”, ka deklaruar Kingji.

Ajo thotë se këto ndryshime kanë nisur në Shtetet e Bashkuara të Amerikës e modelet për reklamat politike do të jenë kudo të njëjtat.

“Kushdo që punon me META-n e dinë, se këto ndryshime nuk janë janë të menjëhershme dhe kurrë nuk janë perfekte”, ka shtuar Kingji në “Përballje Podcast”.

“Përballje Podcast” është realizuar me mbështetjen e Institutit Kombëtar Demokratik (NDI) dhe Agjencisë së Shteteve të Bashkuara për Zhvillim Ndërkombëtar (USAID), në Kosovë. Opinionet e shfaqura në këtë podcast nuk pasqyrojnë domosdoshmërish pikëpamjet dhe qëndrimet e NDI dhe USAID. /Telegrafi/