Përballja me jetën: Rrëfimi i peshkatares me nevoja të veçanta

Ajo ka një dashuri të madhe për jetën. Dhe vështirësitë që ja solli ajo, nuk e bëri që të dorëzohej. Madje sot, po e jetëson edhe ëndrrën e saj.

Është kjo Vjollca Deliu nga Ferizaj, e cila edhe pse është me nevoja të veçanta, kjo nuk e pengon të ushtrojë pasionin e saj, peshkimin.

“Më pëlqen shumë që në kohën e lirë të dal për peshkim. Më pëlqen uji, deti, liqenet. Edhe pse jam me aftësi të kufizuara nuk e kam pas kurrë problem të merrem me këtë pasion. Jam shumë falënderuese ndaj familjes dhe rrethit, pasi më kanë mbështetur shumë. Nuk jam ndier kurrë ndryshe nga të tjerët”, deklaroi për RTV Dukagjinin Vjollca Deliu.

Të jesh me nevoja të veçanta, dhe të punosh pa u ndalur, do të thotë të kesh një zemër të madhe.  Vjollca, ndër të tjera është duke punuar edhe si vëzhguese e kamerave të sigurisë, në njërën nga kompanitë në Kosovë.

“Punoj si vëzhguese e kamerave. Kolegët, menaxherët që janë në punë, asnjëri nuk më shohin ndryshe nga të tjerët. Nuk sillen ndaj meje si një person që kam nevoja të veçanta dhe sillen shumë mirë ndaj meje”, tha Deliu, përcjell Telegrafi

Mes vështirësive dhe dashurisë për jetën, Vjollca Deliu zgjodhi të dytën, dhe sot nuk është penduar aspak.

“Mesazhi im për personat me aftësi të kufizuara është të dalin e të mos qëndrojnë të mbyllur në shtëpi. Të merren me peshkim apo hobi tjera që mund të ndihen mirë me veten. Thjeshtë të mos e pranojnë veten me komplekse, në këtë mënyrë do të na pranojnë edhe të tjerët në mesin e tyre”, thotë Deliu./RTV Dukagjini/Telegrafi/