Pavarësisht negocimit për dorëzim nga ana e policisë, Halili nuk u bind

I dyshuari për vrasjen e ish-bashkëshortes së tij, Sokol Halili të premten ka vrarë veten edhe pse Policia e Kosovës kishin bërë tentativë negocimi për dorëzimin e tij. 

Telegrafi ka arritur të siguroj fotografi nga shtëpia e familjes së të dyshuarit, Halilit, ku shihen pjesëtarë të Policisë së Kosovës.

Ndërkaq, ministri i Punëve të Brendshme, Xhelal Sveçla përmes një statusi në rrjetin social në Facebook ka shkruar se pas një pune intensive të të gjitha njësiteve të Policisë së Kosovës është arritur që të lokalizohet vendndodhja e Sokol Halilit dhe i njëjti përkundër tentativës së zyrtarëve policor që të negociojnë dorëzimin, dorasi ka vrarë veten.

“Pas një pune intenzive të të gjitha njësiteve të Policisë së Kosovës është arritur që të lokalizohet vendndodhja e vrasësit Sokol Halili. Përkundër tentativës së zyrtarëve policor që të negociojnë dorëzimin, dorasi vret veten. Policia e Kosovës si dhe Inspektoriati Policor i Kosovës do të vazhdojnë hetimet për zbulimin e të gjitha rrethanave të vrasjes së gruas shtatëzënë dhe vetëvrasjes së dorasit”, ka shkruar ndër të tjera Sveçla në Facebook. /Telegrafi/