Pastrimi i borës: Si ta bëni këtë punë sa më lehtë dhe të shmangni lëndimet?

Përveç shqetësimeve të shumta që sjell bora në komunikacion, për shumë njerëz ky mot (i keq) nënkupton edhe një shans për një lloj të veçantë rekreacioni – pastrimin e borës para hyrjes së ndërtesave dhe shtëpive tona

Por edhe pse është një detyrë në dukje e thjeshtë që mund të na ndihmojë të kthehemi në formë, pastrimi i borës në mënyrë jo të duhur mund të shkaktojë lëndime.

Udhëzuesi për heqjen e duhur të borës

Ngrohja është e rëndësishme. Për të shmangur dëmtimet, është mirë të ngroheni përpara se të filloni të pastroni borën.

Përndryshe, rrezikoni të dëmtoni shtyllën kurrizore, të ndrydhni gjymtyrët dhe të merrni inflamacion të muskujve, si dhe ekziston rreziku i një ataku kardiak, transmeton Telegrafi.

Edhe një ngrohje e shkurtër mund të na ndihmojë t’i parandalojmë të gjitha këto. Mjafton të tundni krahët disa herë dhe të shtrini muskujt e shpinës, krahëve dhe këmbëve.

Pastrimi i borës bëhet më së miri kur bora është ende e freskët dhe rrjedhimisht e lehtë.

Nëse shtresa e borës është e hollë, ne e fillojmë detyrën thjesht duke e larguar mënjanë borën. Ndërsa, nëse shtresa është më e trashë, pastrimi mund të kërkojë shumë më tepër përpjekje fizike, sepse bora fillon të ngjitet në tokë.

Kjo është gjithashtu një nga arsyet pse teknika e duhur është e rëndësishme gjatë pastrimit.

Shmangni lëvizjet e papritura

Në vendin e përmendur këshillohet të shtyhet bora dhe të mos ngrihet. Nëse kjo nuk është e mundur, rekomandohet të përkulni pak gjunjët dhe të ngrini borën duke i tendosur më shumë këmbët sesa shtylla kurrizore.

Gjithashtu këshillohet që të mos hidhni borë mbi supet tuaja dhe të shmangni lëvizjet e papritura, sepse kur jashtë është jashtëzakonisht ftohtë, trupi ynë është më i ndjeshëm ndaj lëndimeve.

Rekomandohen gjithashtu pushime të rregullta prej 15 deri në 20 minuta.

Gjatë pushimit drejtoni shpinën, shtrini muskujt e krahëve dhe freskohuni me ujë, sepse edhe kur temperaturat janë të ulëta, trupi dehidratohet.

Nëse ndjeni dhimbje muskujsh ose kyçesh, gulçim ose dhimbje gjoksi, është më mirë të ndaloni pastrimin e borës, kontaktoni personin më të afërt për ndihmë dhe, nëse është e nevojshme, shkoni menjëherë te mjeku.

Forma e lopatës na e bën punën më të lehtë

Pastrimi i borës mund të jetë shumë efektiv për djegien e yndyrës. Në një orë të këtij aktiviteti, meshkujt djegin mesatarisht 600 dhe femrat 400 kalori.

Është më mirë të përdorni një lopatë dëbore të dizajnuar në mënyrë ergonomike.

Lopata të tilla nuk janë aq të rënda sa lopatat klasike, të cilat mund të peshojnë deri në 8 dhe 10 kilogramë, dhe ato janë të dizajnuara në mënyrë që pastrimi i borës me to të jetë shumë më i lehtë.

Nëse vendoset kripë në sipërfaqen e mbuluar me borë në kohë, bora do të ngjitet më pak në tokë, pastrimi do të jetë më i lehtë dhe do të ketë më pak rrezik për lëndim dhe dëmtim të lopatës. /Telegrafi/