Pas zbulimit të disa dokumenteve që i kanë siguruar mediat gjermane, është bërë e ditur se Berlini ka dërguar sasi minimale të armëve në Ukrainë

Gjermania ka dërguar sasi minimale të armëve në Ukrainë nga marsi, kështu të paktën tregojnë dokumentet që kanë “rrjedhur” dhe i kanë siguruar mediat gjermane, shkruan Business Insider.

Presidenti rus Vladimir Putin ka paralajmëruar javën e kaluar Gjermaninë, që Ukrainës të mos i ofrojë mbështetje ushtarake – në kohën kur Gjermania duket se po e bën një gjë të tillë, transmeton Telegrafi.

Ky vend ka dërguar vetëm dy herë armë nga marsi, bazuar në dokumentet që i ka siguruar e përditshmja gjermane Welt am Sonntag.

Lexo po ashtu Ushtari rus i tregon gishtin e mesit, droni i Ukrainës “i përgjigjet” duke goditur tankun pranë tij

Qeveria gjermane ka zvogëluar mbështetjen ushtarake javët e fundit – duke dërguar vetëm dy herë armë në Ukrainë nga 30 marsi deri më 26 maj, thuhet në këto dokumente.

Gjatë këtyre dy dërgesave janë përfshirë armë të kalibrit të vogël siç janë minat anti-tank. E Scholz tashmë ka refuzuar të dërgojë tanket gjermane dhe mjetet e tjera të blinduara për këmbësori, pati shkruar Bild në prill.

Ukraina ka kërkuar nga Gjermania edhe raketa anti-anije Harpoon, kërkesë kjo që nuk është miratuar nga Gjermania, thuhet ndër tjera në dokumentet e siguruara nga Welt am Sonntag.

Lexo po ashtu Babai me dy djemtë që po mbrojnë atdheun nga pushtuesi – historia e familjes ukrainase që mori pushkët dhe u nis drejt vijës së frontit

“Informacionet për dërgesat e armëve janë të sigurta dhe të besueshme, ju lutem për mirëkuptim që nuk mund të japim informacione të detajuara”, tha zëdhënësi i ministrisë gjermane të Mbrojtjes.

Ministria gjermane e Mbrojtjes nuk është përgjigjur menjëherë në kërkesën e Business Insider për të komentuar këtë ngjarje. Ky raportim vjen vetëm tri ditë pasi që Putin paralajmëroi Scholzin dhe presidentin francez Emmanuel Macron, sa i përket dërgesave të armëve në Ukrainë.

Në bisedën telefonike të tre liderëve, Putin ka theksuar se vazhdimi i shpërndarjes së armëve në Ukrainë do të rrezikonte “akoma destabilizimin e situatës”, shkruan Die Welt. /Telegrafi/