Pas sulmeve në Liban, asnjë pajisje elektronike nuk po konsiderohet e sigurt për përdorim

Ashtu si turmat ishin mbledhur për të mbajtur zi për disa nga të vrarët në valën e sulmeve me pejxherë-bombë të së martës, një shpërthim ndezi kaos në Dahiyeh, bastioni i Hezbollahut në Bejrutin jugor.

Një video kapi shpërthimin, duke treguar një burrë të shtrirë në tokë dhe njerëzit e kapluar nga paniku, disa duke bërtitur e duke ikur, transmeton Telegrafi.

E gjithë kjo, pak momente para se të fillonin funeralet, për një djalë 11-vjeçar dhe tre anëtarë të Hezbollahut të vrarë një ditë më parë.

Në zonën përreth kishte zhurma e shpërthimit jehoi nëpër rrugë. Këngët pushuan. Të mbledhurit shikonin njëri-tjetrin, disa të habitur.

Ndërsa raportet u përhapën se kjo ishte pjesë e një valë të dytë shpërthimesh që tani synojnë radio-lidhjet, asnjë pajisje elektronike nuk u konsiderua e sigurt.

Mbështetësit e Hezbollahut ndaluan ekipin e BBC-së disa herë, duke kërkuar që të mos përdornin telefonat apo kamerën.

Zyrtarët libanezë thanë se të paktën 20 njerëz u vranë dhe 450 të tjerë u plagosën në të gjithë vendin, me zjarre që thuhet se kanë shpërthyer në dhjetëra shtëpi, dyqane dhe automjete.

Tashmë, sulmet e fundit po shihen si një tjetër poshtërim për grupin e mbështetur nga Irani, dhe një tregues i mundshëm se i gjithë rrjeti i tij i komunikimit mund të jetë infiltruar nga Izraeli.

Shumë njerëz këtu në mënyrë të pashmangshme pyesin se çfarë do të vijë më pas.

Ky është një vend ende i tronditur dhe i zemëruar nga ajo që ndodhi të martën, kur mijëra pejxherë shpërthyen në atë sulm të sinkronizuar, pasi përdoruesit morën një mesazh që besonin se kishte ardhur nga Hezbollahu. /Telegrafi/