Kryeqyteti i Irakut, Bagdadi, është mbuluar sot nga bora pas më shumë se 10 viteve, duke befasuar qytetarët që menjëherë shfrytëzuan rastin për të bërë fotografi, kurse fëmijët u janë përveshur “punës” për të bërë dordolecë nëpër parqe.
Iraku prej kohësh është duke u ballafaquar me probleme të natyrave të ndryshme, duke filluar nga protestat antiqeveritare e deri të vrasje e gjeneralit iranian Qassem Soleimani, në një sulm ajror me dron të realizuar nga ushtria amerikane në aeroportin ndërkombëtar të Bagdadit, transmeton Telegrafi.
Më shumë se 500 persona kanë humbur jetën në protestat e Bagdadit dhe në jug të vendit. Në sheshin e kryeqyteti Tahrir, demonstruesit për një moment janë ndalur dhe kanë shijuar pamjen e rrallë – rënien e borës.
“Falë zotit që po bie borë. Atmosfera është shumë e mirë dhe njerëzit janë të lumtur që po e shohin borën në Irak pas shumë viteve”, ka deklaruar demonstruesja Aymen Ahmad.
Të reshurat e borës janë të shpeshta në zonat kodrinore të Irakut, por shumë të rralla në Bagdad. Për herë të fundit kur kishte rënë borë në këtë kryeqytet ishte viti 2008. /Telegrafi/
