Pajaziti: I padrejtë kushtëzimi i liberalizmit të vizave me demarkacionin me Malin e Zi

Deputeti i Partisë Demokratike të Kosovës, Zenun Pajaziti në Info Magazine të Klan Kosovës ka thënë se kriteri i demarkacionit të kufirit me Malin e Zi, si kusht për liberalizim të vizave, është i padrejtë.

“Është vendosur në agjendën e Komisionit Evropian që demarkacioni të jetë kriter dhe kjo nuk është e drejtë, pasi asnjë shtet nuk e ka pasur këtë kriter për liberalizim”, tha Pajaziti.

Ai ka kritikuar qeverinë dhe opozitën për sfidat me të cilat është përballur ky proces, duke mos përjashtuar as bashkësinë ndërkombëtare.

“Nuk është se kemi ndonjë problem me Malin e Zi dhe nuk duhet të mbesim peng. Dy palët janë gabim. Qeveria në një mosmenaxhim të mirë, nuk ka pasur një hulumtim të detajuar dhe opozita me metodat e saj”.

Pajaziti nuk ka dashur të paragjykojë rezultatin e një votimi të mundshëm për demarkimin e kufirit në Kuvend, por ka tërhequr një paralele mes rëndësisë për qytetarët në raport me liberalizimin e vizave.

“Nëse i pyesim qytetarët se a janë për Demarkacionin apo liberalizimit të vizave, përgjigja është ndoshta për vizat ,andaj nuk e paragjykoj votën time në Kuvend. Por ka hapësirë që të përmirësohet ndonjë gabim. Unë për vete kam një bindje se shkuarje në zgjedhje në këtë kohë nuk prodhon ndonjë ndryshim. Ky koalicion duhet të merret më shumë për sfidat që janë para nesh”.

Pajaziti tha se koalicioni qeverisës është duke funksionuar mirë dhe nuk ka asnjë problem mes partnerëve – veç disa kundërshtive të vogla.

“Një kundërshti ne mes koalicionit është normale, opozita gjithmonë e ka vendin e vetë. Përfaqësimi është në masën e kufizuar meqë nuk është opozita duhet të jenë votat e nevojshme dhe prania e deputetëve. Nuk është se deputetët vijnë më shumë dhe me pak, krahasuar me vitet tjera, por kur opozita mungon çdo mungesë vërehet”.

Ai ka deklaruar se mungesa e deputetëve të pozitës në Kuvend nuk lidhet me problemet mes partnerëve të koalicionit, por me angazhimet e deputetëve, njofton Klan Kosova.

“Në Parlament nuk janë të gjithë deputetët që e kanë punë primare Kuvendin, ka deputetë që janë ligjërues kanë angazhime tjera e kështu me radhë”.

“Nuk ka problem mes koalicionit, sot ka qenë një neglizhencë më shume e deputetëve sesa diçka tjetër. Nuk ishte pamje e mirë sot kur salla ishte e boshatisur, njëjtë sikur kur kishte tym e gaz në Kuvend”, tha Pajaziti.