Një djalë 13 vjeçar është ndaluar nga Philips Stadion në Eindhoven, pasi hyri në fushë për t’u fotografuar me Memphis Depay gjatë ndeshjes ndërmjet Holandës dhe Malit të Zi.
Djaloshi i quajtur Amin i kaloi rrethojat në minutën e 89-të takimit që Tulipanët e fituan me rezultat 4-0 dhe vrapoi në fushë drejt yllit të Barcelonës për t’u fotografuar.
Për shkak të këtij veprimi, atij i është ndaluar hyrja në stadium për pesë vite dhe një gjobë prej 350 eurosh. Më pas, kjo shumë është ulur në 100 euro duke u marrë në konsideratë mosha e tij.
Ky incident ka ardhur vetëm disa ditë, pasi një tjetër tifoz kishte ndërhyrë në intervistën e Virgil Van Dijk pas ndeshjes më 1 shtator.
Mbrojtësi holandez ishte duke folur para kamerës për barazimin (1-1) kundër Norvegjisë kur tifozi iu afrua për të bërë një ‘selfie’.
Yllit të Liverpoolit nuk i kishte pëlqyer kjo situatë dhe e kishte shtyrë tifozin duke kërkuar nga sigurimi që ta zgjidhte situatën.
Ndërkohë që Depay u tregua më i këndshëm me djaloshin Amin dhe pranoi të fotografohej me të. /Telegrafi/
