Osmani tregon nëse do ta nënshkruajë mocionin e mosbesimit ndaj Qeverisë Hoti

Deputetët e Kuvendit të Kosovës do t’iu rikthehen seancave plenare këtë të enjte. Dy javë pasi është arritur marrëveshja e Uashingtonit për normalizimin ekonomik me Serbinë, kryeministri Avdullah Hoti do të raportojë para të zgjedhurve të popullit. E këtij të fundit, kryeparlamentarja Vjosa Osmani ia atribuon dështimin në miratimin e ligjeve gjatë sesionit pranveror.

Në një konferencë për medie pas mbledhjes së Kryesisë së Kuvendit, Osmani theksoi edhe se partner të vetëm në rast të zgjedhjeve të parakohshme e ka partinë e Albin Kurtit, por tha se nuk ka vendosur ende se a do të nënshkruajë mocionin e mosbesimit ndaj Qeverisë Hoti.

Osmani e largoi barrën nga Kuvendi për dështimin e miratimit të pakos për rimëkëmbje ekonomike, teksa tha se është obligim i shumicës parlamentare të sigurojë votat e 61 deputetëve.

“Është obligim i shumicës parlamentare siç ka qenë në çdo legjislaturë para kësaj të ketë vota të mjaftueshme për t’i kaluar ligjet. Pra kërkohet shumicë e thjeshtë në qoftë se vetëm e marrim si shembull projektligjin për rimëkëmbje ekonomike që ka qenë një prej ligjeve të fundit që është trajtuar në sesionin paraprak aty shumica parlamentare i ka pasur 42 deputetë. Obligim parësor është mbi shumicën parlamentare të sigurojë 61 deputetët e vet që të jenë në seancë dhe të marrim pjesë në votim”, tha ajo.

Osmani foli edhe për seancën e radhës të Kuvendit, ku bëri të ditur se përveç raportimit të kryeministrit, në interpelancë do të jenë ministri i Punëve të Brendshme, Agim Veliu për çështjen e Karaçevës dhe ai i Arsimit, Ramë Likaj për fillimin e procesit mësimor në kohë pandemie.

“Çështja e parë ka të bëjë me raportimin e kryeministrit për dialogun. Kryeministri e ka obligim kushtetues t’i raportojë Kuvendin edhe për çështje të politikës së jashtme. E në veçanti këtu për dialogun bazuar në Kushtetutë, por edhe një sërë rezolutash që janë miratuar në Kuvendin e Kosovës. Ne kemi vendosur si kryesi e Kuvendit që kryeministrinë të ftojmë të raportojë të enjten si pikë e parë e rendit të ditës në seancën e re. Para se të vazhdojmë me atë seancë, ne do të votojmë disa pika për të cilat nuk ka pasur kuorum në seancat e mëparshme”, tha ajo.

E pyetur se a do ta nënshkruajë mocionin e mosbesimit ndaj Qeverisë Hoti, kryeparlamentarja Osmani tha ende nuk kanë diskutuar me Lëvizjen Vetëvendosje.

“Sa i përket çështjes së mocionit, ne nuk e kemi diskutuar këtë çështje me VV dhe as nuk e kam parë tekstin. Në momentin që ulem dhe e shqyrtojë do të vij me një përgjigje konkrete për ju”, tha Osmani.

Duke folur rreth partneritetit të mundshëm në rast të zgjedhjeve të parakohshme parlamentare, ashtu sikurse po kërkon Lëvizja Vetëvendosje, Vjosa Osmani ka bërë të ditur se partinë e ish-kryeministrit Kurti e sheh si partnerin e vetëm.

“Për momentin partner të vetëm dhe pakontestueshëm sa i përket koalicioneve parazgjedhore e shoh vetëm Lëvizjen Vetëvendosje”, u shpreh Osmani, e cila ka paralajmëruar formimin e një iniciative të re politike, pas daljes nga Lidhja Demokratike e Kosovës, për shkak të kundërshtimeve ndaj qëndrimeve të partisë.

Kryeparlamentarja po ashtu tha se ajo nuk ka lobuar asnjëherë ndaj projektligjeve që Qeveria e Kosovës ka dorëzuar në Kuvend për miratim, por për çështje të interesit nacional i ka shtyrë ato përpara./kp/Telegrafi/