Osmani: ​Përqindje e ulët e grave në ushtri

Presidentja e vendit, Vjosa Osmani ka thënë se në ushtrinë e Kosovës aktualisht janë vetëm 10% gra. Sipas saj, kjo përbën një përqindje të ulët.

Osmani ka folur në konferencën me temën “Avancimi i përfaqësimit dhe rolit të grave në ushtri: Një hap drejt barazisë më të madhe gjinore, paqes dhe sigurisë”, e cila organizohet në kuadër të Qendrës Rajonale të Ekselencës për Gratë, Paqen dhe Sigurinë në Kosovë.

“Kosova po shquhet jo vetëm brenda rajonit, por edhe në nivel ndërkombëtar. Në këtë drejtim ka shumë punë për t’u bërë, bota po përballet me sfida shumë komplekse. Aty ku ka pabarazi gjinore nuk ka sukses. Niveli prej 10 për qind është tejet i ulët. Asnjëherë nuk duhet të mjaftohemi me kaq, ne mundemi dhe duhet të bëjmë më mirë se kaq. Sidomos ne si shtet që synojmë anëtarësimin në NATO”, ka thënë Osmani.

Ajo ka shtuar se gjatë takimeve që zhvilloi në selinë e NATO-së “tema e parë e diskutimit ishte angazhimi i Kosovës në agjendën për gratë, paqen dhe sigurinë”.

Sipas saj, përfshirja e grave ushtarake dhe angazhimi e avancimi i tyre janë në boshtin e NATO-s.

Duke shprehur bindjen që Kosova mund të bëjë më shumë në këtë drejtim, komandantja supreme e FSK-së ka thënë se duhen vepra konkrete, politika të përshtatshme dhe resurse të bollshme.

Ministri i Mbrojtjes, Ejup Maqedonci, ka thënë se si ministri kanë krijuar infrastrukturë ligjore që krijon barazi gjinore për të gjithë.

“Në Kosovë gratë dhe vajzat kanë qenë ato që kanë përjetuar mizorit. 20 mijë është numri i grave të dhunuara. Do të vazhdojmë që të angazhohemi në eliminimin e pengesave që stagnojnë avancimin e grave në Forcë. MB-ja ka krijuar infrastrukturë ligjore që krijon barazi gjinore për të gjithë. Gratë ushtare sot operojnë në kushte me të mira. Të gjitha masat e ndërmarra janë shtysa dhe inkurajojmë për integrimin e grave në ushtri”, ka thënë ai./Telegrafi/