Në Komunitetin Politik Evropian, Osmani flet për zhvillimet në Kosovë

Presidentja Vjosa Osmani po e përfaqëson Republikën e Kosovës në samitin e liderëve të Komunitetit Politik Evropian, prej ku ka publikuar fotografi nga takime me liderë nga rajoni e Evropa, me të cilët ka diskutuar për zhvillimet e fundit në Kosovë.

“Në pritjen e organizuar nga presidentja e Moldavisë, Maia Sandu, për liderët e shteteve anëtare të Komunitetit Politik Evropian, diskutime me miq për zhvillimet e fundit në Kosovë”, ka shkruar presidentja Osmani në një postim në Facebook.

Ndryshe, me ftesë të organizatorëve të Komunitetit Politik Evropian, presidentja e Republikës së Kosovës, Vjosa Osmani, ka udhëtuar për në Kishinau të Republikës së Moldavisë ku është duke përfaqësuar Republikën e Kosovës në samitin e dytë të Komunitetit Politik Evropian (EPC).

Osmani i është bashkuar 46 krerëve të tjerë të shteteve të kontinentit evropian, si dhe krerëve të institucioneve të BE-së, me qëllim të nxitjes së dialogut politik dhe forcimit të bashkëpunimit për t’i adresuar çështjet më urgjente të sigurisë dhe stabilitetit në Evropë.

Po ashtu, krahas pjesëmarrjes në sesionet kryesore të Komunitetit Politik Evropian, presidentja Osmani do të zhvillojë edhe takime me liderë të tjerë evropianë.

Ndërkaq, para liderëve të tjerë evropianë, presidentja Osmani do ta përçojë mesazhin e përkushtimit të palëkundur të popullit dhe institucioneve të Republikës së Kosovës për integrimin euroatlantik të Kosovës si garanci për paqe të qëndrueshme në rajon dhe më gjerë.

Gjatë takimeve bilaterale, presidentja Osmani do të diskutojë thellimin e bashkëpunimit për shtyrjen përpara të aplikimit të Kosovës për BE, çështje që lidhen me situatën e sigurisë në rajon, si dhe tejkalimin e sfidave të përbashkëta.

Komuniteti Politik Evropian është platformë për koordinim politik e krijuar mbi bazën e propozimit të Presidentit francez, Emmanuel Macron, e cila synon nxitjen e dialogut dhe bashkëpunimit për çështje me interes të përbashkët, forcimin e sigurisë, stabilitetit dhe prosperitetit në kontinentin evropian. /Telegrafi/