Presidentja e Republikës së Kosovës, Vjosa Osmani, është nderuar mbrëmë në Anagni, qytetin e Papëve, me Çmimin Bonifacio VIII, një vlerësim i dhënë nga Akademia Bonifaciana për angazhimin e saj institucional në promovimin e paqes dhe kontributin e vazhdueshëm në forcimin e bashkëpunimit ndërkulturor dhe ndërfetar.
Sipas njoftimit të Presidencës, ky çmim pasqyron misionin dhe frymën e Akademisë Bonifaciana, institucion prestigjioz që në qendër të veprimtarisë së tij ka drejtësinë, dinjitetin njerëzor dhe paqen.
Çmimi Bonifacio VIII u është ndarë edhe më herët personaliteteve të shquara botërore, përfshirë Shenjtërinë e Tij, Papa Gjon Palin II.
Me rastin e pranimit të çmimit, Presidentja Osmani ka theksuar se ky vlerësim përforcon përkushtimin e saj ndaj vlerave universale dhe të përhershme, të cilat udhëheqin vizionin dhe veprimin institucional të Republikës së Kosovës në ndërtimin e paqes, dialogut dhe mirëkuptimit ndërmjet popujve./Telegrafi/
