Opozita thotë se me të gjitha mjetet do ta kundërshtojnë Qeverinë Kurti

Ish pushtetarët e koalicionit PAN, thonë se do të përdorin çdo mundësi, përfshirë edhe protestat për të qenë kritikë ndaj shefit të ri të ekzekutivit. Ndërsa, shoqëria civile kërkojnë që opozita të jetë konstruktive në temat nacionale. ​

Deputeti i AAK-së, Rasim Selmanaj thotë  se varësisht prej vendimeve të qeverisë Kurti, ata do të ndërmarrin veprimet.

“Për veprimet e mira dhe vendimet e mira gjithmonë do të kenë përkrahjen edhe të opozitës, sidomos kur bëhet fjalë për tema nacionale, por po ashtu për vendimet e këqija ose për krejt ato që ne e vlerësojmë se nuk po shkon mirë, do të jemi në nivelin e opozitës. Pra kritik ndaj tyre… edhe protestat janë proces demokratik, mjet që e përdorin gjithandej në botë. Në këtë rast opozita, por uroj që mos të ketë nevojë me pas protesta për tema të caktuar”, thotë ai.

Ndërsa, shefi i grupit parlamentar të Nismës Socialdemokrate, Haxhi Shala kërkon bosht opozitar për të kundërshtuar qeverinë Kurti, derisa thekson se në asnjë moment ata nuk do të jenë aty për t’i shërbyer dhe bërë korumin partive në pushtet.

“Ne duhet në fillim të koordinohemi, të bëjmë boshtin opozitar. Në bazë të veprime të veprojmë si bosht opozitar. Kurse sa i përket Nismës të gjitha çështjet nacionale që do të kërkojë Qeveria për vendin ne edhe në natyrën tonë është që i mbështesim ato. Kurse për çështjet tjera jemi në opozitë… Opozita nuk është për t’i bërë kuorum pozitës. Për këtë çështje duhet të mendoj pozita. Asnjëherë opozita dhe Nisma Socialdemokrate nuk do t’i bëjë kuorum pozitës”, u shpreh Shala.

KosovaPress ka tentuar disa herë që të kontaktojë me disa prej deputetëve të PDK-së në lidhje me këtë çështje, por ata nuk kanë qenë të qasshëm.

E njohësit e rrethanave politike dhe shoqëria civile thonë se opozita në këtë legjislaturë do të jetë e fortë, por kërkuan edhe konstruktivitet nga ana e tyre për tema nacionale.

Analisti politik, Faton Abdullahu nuk përjashton mundësinë që ‘komandantët’ opozitarë të bëjnë edhe veprime jashtë institucionale.

“Të gjitha këto bashkë e bëjnë opozitën që të jetë edhe agresive në kuptimin opozitar demokratik, por edhe unike. Mbetet të shihet, por konsideroj që opozita do të jetë e fortë, unike dhe përmbledhtazi është mirë për shëndetin demokratik në Kosovë…do të varet nga ajo çfarë do të bëj Qeveria Kurti, por mesa po shoh disponimin tek pjesa më e madhe opozitare, mesa po shoh disponimin konsideroj që opozita nuk do ta lë me veprime konvencionale, por do të veprojë edhe ndryshe”, thotë ai.

Ndërsa, drejtoresha e Grupit për Studime Juridike dhe Politike, Arbëresha Loxha i rendit gjitha arsyet se pse gjitha partitë parlamentare duhet të jenë unike në këtë legjislaturë.

“Konsiderojë që opozita e tanishme, shpresoj të paktën të ketë një rol opozitar konstruktiv, sepse Kosovën e presin shumë procese duke filluar nga dialogu me Serbinë. Tashmë çështja e buxhetit e cila është e rëndësie së lartë, por edhe procesi i vetingut, të cilat në njëfarë mënyre e kanë të domosdoshme konsensusin politik. Pra në fillim pjesëmarrjen aktive të gjithë spektrit politik në rastin e dialogut të hartimit të një platforme për dialog dhe është mendoj koha e fundit për spektrin politik në Kosovë që të ketë një qëndrim të përbashkët dhe një qasje proaktive ndaj dialogut që të reprezantohemi sa më mirë në këtë fazë finale”, deklaron Loxha.

Në zgjedhjet 6 tetorit të vitit 2019, tri partitë që kanë qenë në pushtet legjislaturën e kaluar, PDK, AAK dhe Nisma janë në opozitë./kp/Telegrafi/