Nrecaj: Letra e Kurtit drejtuar Speciales, mund të konsiderohet ndërhyrje në drejtësi

Shkresa e liderit të Vetëvendosjes, Albin Kurti, nisur Gjykatës Speciale për lirimin me kusht të Rexhep Selimit, nga njohës së fushës së drejtësisë po konsiderohet se mund të jetë ndërhyrje e politikës në punën e Gjykatës.

Nëpërmjet një letre drejtuar Gjykatës Speciale, Kryetari i Lëvizjes Vetëvendosje, Albin Kurti ka kërkuar lirimin me kusht të Shefit të Grupit Parlamentar të partisë së tij, Rexhep Selimi, i cili po mbahen në qendrën e paraburgimit në Hagë.

“Çdo pretendim i ngritur lidhur me faktin që ai mund ta paraqes rrezik të ikjes bie ndesh me karakterin  e Rexhepit dhe përvojën tonë. Për të gjithë ata që e njohin Rexhepin (përfshirë edhe mua) është e paimagjinueshme që ai mund të kryejë një veprim të tillë”.

Për këtë letër pati reagim përmes Facebook-ut, deputeti i Partisë Demokratike të Kosovës, Sejdi Hoxha.

“Letra e juaj drejtuar gjyqtarit të Gjykatës Speciale, Nicolas Guillou për ta liruar me kusht luftëtarin e lirisë Rexhep Selimi është një iniciativë e mirë, por më bënë përshtypje shpërfaqja e juaj e urrejtjes ndaj luftëtarëve tjerë të lirisë”, shkruan Hoxha.

Anton Nrecaj nga Instituti CLARD, thotë se kjo letër e Kurtit dërguar Speciales, mund të konsiderohet si ndërhyrje në punën e Gjykatës.

“Mendoj se kjo letër e Kurtit,  drejtuar Gjykatës Speciale mund të ketë efekt negativ: E para është se mund të konsiderohet një lloj presioni ndaj gjykatës, e cila involvon ndërhyrjen e politikës në proceset gjyqësore…Për këto letra autorizimin e kanë vetëm përfaqësuesit ligjor të zotit Selimi”, deklaroi për RTV Dukagjinin, Anton Nrecaj.

Për dërgimin e letrës së Kurtit reaguan edhe përfaqësueses të ndryshëm të partive politike./Telegrafi/