Noari 7-vjeçar vuan nga një sëmundje e rrallë, ka nevojë për ndihmën e qytetarëve

Noar Jahiri, shtatëvjeçari nga Fushë Kosova që vuan nga sëmundja e rrallë SSPE (subacute sclerosing panencephalitis) dhe epilepsi, aktualisht ka nevojë urgjente për ndihmën e qytetarëve për të vazhduar trajtimin e tij në Turqi.

Nëna e tij, Shpresa Qyqalla Jahiri, ka treguar për Telegrafin se shpenzimet e trajtimit deri tani janë shteruar dhe se ndihma financiare është e domosdoshme për të mbështetur vazhdimin e trajtimit të djalit të saj.

Në një intervistë, Shpresa Qyqalla Jahiri ka theksuar se trajtimi i Noarit në një spital turk ka qenë i shtrenjtë, duke kërkuar ndihmën e qytetarëve për të mbuluar kostot.

“Për momentin, trajtimi i Noarit kushton 90 mijë euro në Turqi. Ne kemi ardhur me mundësitë tona, por shuma është shumë e lartë. Spitalet tjera që e kemi konsultuar na kanë thënë se sëmundja është e pashërueshme, por këtu ka filluar të përmirësohet. Duam ta vazhdojmë trajtimin deri në fund”, ka shpjeguar ajo.

Shpresa gjithashtu ka bërë të ditur se kanë kërkuar ndihmë nga Ministria e Shëndetësisë, por kanë marrë vetëm njëherë ndihmë financiare në vitin 2021.

“Ne nuk kemi biseduar më me Ministrinë e Shëndetësisë. Spitali në Turqi nuk kishte marrëveshje me Ministrinë dhe kemi ardhur me financat tona për gjysmë. Nuk kemi ndihmë tjetër nga ata. Kemi nevojë për ndihmën e qytetarëve tani”, ka shtuar ajo.

Nga ana tjetër, Telegrafi ka kontaktuar Ministrinë e Shëndetësisë për të marrë një informacion më të detajuar mbi rastin e Noarit.

Sipas përgjigjes së ministrisë, pacienti ka aplikuar më 1 tetor 2021 si rast urgjent i referuar nga Klinika e Pediatrisë.

“Ju njoftoj që sipas të dhënave që posedon Divizioni për TMJISHP dhe arkiva e FSSH-së, pacienti në fjalë ka aplikuar më datë 01.10.2021 si rast urgjent i referuar nga Klinika e Pediatrisë. Për të njëjtin drejtori i Fondit ka lëshuar fletë zotim dhe Bordi ekzekutiv ka nxjerr vendim me shumën financiare në vlerë prej 8,703,20 euro ku edhe është realizuar pagesa”, thuhet në përgjigje, duke shtuar se për të njëjtin nuk ka aplikim tjetër pranë FSSH-së.

Për të mbështetur Noar Jahirin në këtë periudhë të vështirë, familjarët apelojnë qytetarët që të kontribuojnë në ndihmën e tij financiare.

Nëse dëshironi të ndihmoni, mund të kontaktoni familjen Jahiri ose të kontribuoni në llogarinë e tyre bankare të dedikuar për këtë qëllim.

Shpresa Qyqalla Jahiri: TEB Sh.A XK05 20-14-0000391823-61. /Telegrafi/