Një pjesë të përfitimeve nga meçi me Wilder, Tyson Fury do t’i dhurojë për të ndihmuar shtëpi për të pastrehët

Tyson Fury planifikon t’u ndihmojë të pastrehëve në Mbretërinë e Bashkuar duke i dhuruar për ta disa prej përfitimeve nga meçi ndaj Deontay Wilder.

Të shtunën në Los Angeles, britaniku ndeshet me kampionin në kategorinë e peshave të rënda në WBC.

“Kur të kthehem në shtëpi do t’i ndërtoj disa shtëpi për të pastrehët dhe do të grumbulloj ca fonde për të varurit nga droga dhe alkoolikët”.

“Gjithmonë kam dashur ta bëj këtë, por duke qenë këtu (në Kaliforni) më jep një shtytje shtesë që ta bëj akoma më shumë”, ka thënë 30-vjeçari.

Lexo po ashtu Lajmet për Tyson Furyn

Derisa është stërvitur në Kaliforni, Fury është habitur nga numri i madh i të pastrehëve në shtetin më të populluar amerikan.

Në zona të ndryshme të Los Angelesit, vërehen tenda anësh rrugëve, nën ura dhe në parqe.

Në muajin shkurt të këtij viti, Los Angeles Times kishte raportuar se rreth 55.000 njerëz ishin të pastrehë.

“Vërtet mi ka hapur sytë për shumë gjëra dhe do të largohem si person më i mirë. Kam mundur të shoh kultura të ndryshme dhe shumë gjëra të ndryshme që po ndodhin këtu”, ka thënë Tyson, i cili qe nëntë javë është në SHBA. /Telegrafi/