Një nxënës i vdekur, disa të lënduar – pasi një autobus shkollor godet një automjet, del nga rruga dhe përplaset me një pemë në Gjermani

Një tragjedi në një rrugë të rrëshqitshme dimri në Gjermani.

Bëhet fjalë për ngjarje kur një autobus shkolle pati një aksident të rëndë pranë Cranzahl, një qytet i vogël në Erzgebirgskreis.

Si pasojë, siç raportojnë mediat gjermane, një nxënës ka vdekur – ndërsa 13 persona të tjerë janë lënduar.

Sipas raportimit të mediave gjermane, përcjell Telegrafi, aksidenti ka ndodhur rreth orës 06:30 në rrugën e mbuluar me borë Richterstrasse.

Sipas gjetjeve fillestare të policisë, autobusi i shkollës është përplasur me një automjet të shërbimit dimëror.

Më pas autobusi ka dalë nga rruga dhe është përplasur me një pemë.

Siç ka konfirmuar një zëdhënëse e policisë për BILD, një fëmijë shkolle humbi jetën në aksident.

Ajo megjithatë nuk ka treguar nëse bëhet fjalë për vajzë apo djalë. Aktualisht nuk dihet edhe mosha e viktimës.

Ndërkohë, dy të rritur, përfshirë shoferin e autobusit, kanë mbetur të lënduar rëndë nga aksidenti.

Njëmbëdhjetë persona të tjerë, dhjetë prej të cilëve ishin fëmijë, pësuan lëndime të lehta.

Në vendngjarje ka një numër masiv shërbimesh emergjente dhe qarkullimi është plotësisht i mbyllur.

“Shkaku i saktë i aksidentit është ende duke u përcaktuar. Operacioni në vendngjarje është ende në vazhdim me shërbime të shumta emergjente”, ka thënë zëdhënësja e policisë. /Telegrafi/