Një fans i Dua Lipës kërkon dëmshpërlbim nga këngëtarja pasi u lëndua nga mjetet piroteknike gjatë koncertit të saj në Malajzi

Një fans i këngëtares me famë botërore, Dua Lipa, ka pohuar se është lënduar rëndë në një aksident piroteknik gjatë një koncerti të saj në Malajzi.

Artistja britanike ndodhet aktualisht në turneun e saj “Radical Optimism”, dhe koncertet në Azi nisën më 5 nëntor në Singapor. Megjithatë, më pak se një muaj pas fillimit të turneut, i cili do të zgjasë deri në tetor 2025, fansi ka ngritur pretendime për një lëndim gjatë një prej performancave në “Axiata Arena” në Kuala Lumpur më 23 dhe 24 nëntor.

Në një postim në Reddit, fansi ndau një fotografi duke treguar pretendimet e tij mbi atë që ndodhi. Ai pyeti ndjekësit nëse mund të kompensohej për dëmin e pësuar. “Më goditi në kokë një tub metalik piroteknik gjatë koncertit të Dua Lipës në Malajzi sot”, shkroi ai.

Në komentet e mëvonshme, fansi përshkroi me më shumë detaje atë që kishte ndodhur, falënderoi ndjekësit për mbështetjen dhe sqaroi se pas incidentit kishte marrë shtatë qepje dhe një skanim të trurit (CT scan). Ai pretendoi se dy persona kishin paguar faturën e tij mjekësore prej 2712 ringit malajzianë (rreth 482.10 paund apo 579.79 euro).

“Dy djem erdhën dhe filluan të flasin për kompensim për hotelin, biletat e koncertit dhe fluturimin. U thashë se nuk isha gati të flisja dhe se duhet të kontaktoja ambasadën, avokatin dhe ndoshta policinë. Ata paguan faturën time spitalore sepse nuk kam para për këtë. Nuk dua të prish reputacionin e Dua Lipës, nuk është e drejtë. Dua vetëm kompensim të drejtë për këtë përvojë pranë vdekjes (kam pasur fat që tubi prej 5-7 kilogramë nuk më goditi me anën e mprehtë)”, shkroi fansi.

Më tej, ai shtoi: “Pasi paguan faturat e mia mjekësore, njëri prej tyre kërkoi të fshija postimin, por refuzova. Gjithashtu, nuk pranova të më dërgonin në hotel. Mora numrat e tyre dhe u thashë se ndoshta do të flasim nesër”.

Në postimin e tij, fansi pohoi se një “autoritet i stadiumit” i kishte konfirmuar se përveç faturave mjekësore, asgjë tjetër nuk do të kompensohej. Nuk ka ende konfirmime nëse pajisjet piroteknike ishin pjesë e shfaqjes apo ishin përdorur nga spektatorët.

Një zëdhënës i Live Nation i tha gazetës The Mirror: “Kemi kërkuar informacion të detajuar nga furnitori i përfshirë mbi mënyrën se si ndodhi kjo, dhe natyrisht urojmë një rikuperim të shpejtë për të dy fansat”.

Dua Lipa është përballur edhe më parë me incidente të ngjashme. Në korrik 2022, gjatë një koncerti në Toronto, fishekzjarre të “papaautorizuara” u ndezën nga turma, duke shkaktuar lëndime tek disa fansa. Pas incidentit, ajo kërkoi falje, duke deklaruar:

“Nata e kaluar, fishekzjarre të papaautorizuara u ndezën në turmë gjatë performancës sime në Toronto. Krijimi i një hapësire të sigurt dhe gjithëpërfshirëse në koncertet e mia është gjithmonë prioriteti im i parë, dhe unë dhe ekipi im jemi po aq të tronditur dhe të habitur nga ngjarjet sa edhe ju.

Një hetim mbi ngjarjen po vazhdon, dhe të gjithë të përfshirët po punojnë për të kuptuar si ndodhi kjo. Realizimi i këtij koncerti për fansat e mi ka qenë një përvojë e mrekullueshme, dhe më vjen thellësisht keq për këdo që u tremb, ndjeu pasiguri, ose u ndikua negativisht nga kjo ngjarje. Gjithë dashuria ime, Dua”. /Telegrafi/