Niall Horan anulon turneun botëror për shkak të coronavirus

Kriza globale e shkaktuar nga pandemia coronavirus ka filluar që të shkaktojë probleme në industrinë e muzikës.

Shumë turne botërore që do të mbaheshin këtë vit, janë anuluar për shkak të respektimit të masave mbrojtëse ndaj virusit vdekjeprurës.

Këngëtari Niall Horan anuloi turneun e tij solo për shkak të këtij virusi, ku përpos këtij lajmi dha edhe një mesazh për ndjekësit e tij, shkruan Mirror.

Niall shtoi se ishte e rëndësishme për të që të përcaktojë me përparësi sigurinë e “ndjekësve dhe familjes së tij në turne”. Në një deklaratë të lëshuar në mediat sociale, ai shkruante: “Duke pasur parasysh rrethanat e pashembullta kam vendosur të mos ec përpara me turneun botëror”.

“Ky ishte një vendim i vështirë, por mirëqenia e ndjekësve të mi dhe e familjes së turneut është gjithmonë përparësia ime kryesore”.

“Duke mos qenë në gjendje të bëj një turne për atë që është në të vërtetë shumica e vitit 2020, nuk ndjehem mirë dhe më vjen shumë keq për të gjithë ju njerëz të mahnitshëm që keni blerë bileta”.

https://www.instagram.com/p/B-hr92DnDmL/

“Mezi pres të jem në gjendje të sjell muzikë të re dhe një turne të ri për të gjithë adhuruesit e mi nëpër botë në vitin 2021”, ka shkruar muzikanti duke shtuar se biletat do të ktheheshin dhe datat e reja do të shpalleshin pasi të vendoset rendi.

Niall u ngrit në famë si pjesë e “One Direction” në ‘The X Factor’ në vitin 2010 dhe prej asaj kohe ka ndërtuar një karrierë të suksesshme solo. /Telegrafi/