Në Samitin COP28 Arsovska, prezantoi laboratorin bioteknologjik të qytetit të Shkupit, i cili është i pari i këtij lloji në rajon

Në Samitin COP28, që po mbahet në Emiratet e Bashkuara Arabe, kryetarja e Qytetit të Shkupit, Danella Arsovska, ka shkëlqyer me pjesëmarrjen e saj në programin e granteve të Samitit Lokal të Veprimit për Klimën. Qyteti i Shkupit ka fituar vëmendjen e botës me hapjen e laboratorit të parë publik të bioteknologjisë në Maqedoni dhe rajon.

Ky laborator biologjik inovativ është rezultat i bashkëpunimit të suksesshëm mes Qytetit të Shkupit, UNDP-së dhe UNICEF-it dhe është ndërthurur në programet shkollore të qytetit. Shkolla e mesme “Maria Kiri Sklodovska” ka qenë vendi ku ky laborator ka hapur dyert e tij, duke ofruar një hapësirë unike për nxënësit, studentët, profesorët dhe sipërmarrësit për të eksploruar botën e bioteknologjisë.

Në këtë laborator, të rinjtë marrin pjesë në eksperimente dhe projekte që çojnë në riciklimin dhe ripërdorimin e bio-mbeturinave, duke zhvilluar një kulturë të përgjegjshme ndaj mjedisit. Përveç kësaj, ata përfshihen në studime mikrobiologjike dhe metodat molekulare, duke përmirësuar njohuritë e tyre në fushën e bioteknologjisë dhe shkencës së ADN-së.

Në kuadër të Samitit Lokal të Veprimit për Klimën, kryetarja Arsovska ka shprehur angazhimin e qytetit për transformimin e mbetjeve biologjike dhe përdorimin e teknologjisë për të gjetur zgjidhje inovative për mbrojtjen e mjedisit. Në këtë kontekst, roli i të rinjve është thelbësor, dhe ata inkurajohen të jenë pjesë e projekteve dhe inovacioneve që kontribuojnë në zhvillim të qëndrueshëm socio-ekonomik.

Samiti Lokal i Aktiviteteve Klimatike, nën kujdesin e Bloomberg dhe Presidencës së Emirateve të Bashkuara Arabe, ka sjellë në një vend kryetarët e bashkive dhe guvernatorët, duke theksuar rolin e tyre kyç në luftën kundër ndikimeve klimatike. Ky samit ka shërbyer si platformë për dialog dhe veprime të përbashkëta në drejtim të një mjedisi të qëndrueshëm dhe zhvillimit të qëndrueshëm global. /Telegrafi/