Në Prishtinë mbahet turnir për video-lojën LoL, fituesi e përfaqëson Kosovën në garat e Brazilit

Ndonëse janë kritikuar vazhdimisht, video-lojërat kanë filluar të marrin një hov zhvillimi profesionist edhe në Kosovë.

Në vendin tonë ka shumë adhurues të video-lojërave, madje shumë prej tyre mund të konsiderohen edhe profesionistë në lojëra të ndryshme, pasi që kanë arritur të kualifikohen në garat më prestigjioze botërore.

Së fundmi është duke u mbajtur në Prishtinë turneu ‘Red Bull Player One’ – turne ndërkombëtar me format 1vs1 në njërën nga lojërat më të popullarizuara, League of Legends.

Për herë të parë në Kosovë u mbajtën 2 etapa kualifikuese dhe këtë të shtune mbahet finalja kombëtare, që do t’u japë mundësi 16 garuesve t’i tregojnë shkathtësitë e veta, ndërsa fituesi do të jetë përfaqësues i shtetit në finalen botërore në Brazil në mesin e 17 shteteve të tjera.

Vizioni i këtij turniri është promovimi dhe avancimi i komunitetit të adhuruesve të video-lojërave, si dhe mundësia që personat e talentuar të depërtojnë në skenën botërore të këtij sporti. /Telegrafi/