Në Pejë mbahen lojërat tradicionale Rugova 2019, ka interes edhe nga SHBA

Për të 28-ën herë, më 4 gusht do të mbahen lojërat tradicionale Rugova 2019.

Ngjarja do të mbahet në fshatin Stakaj të Pejës duke filluar nga ora 11:00.

Për RTV Dukagjinin, anëtari i Këshillit Organizativ, Vesel Nikçi ka dhënë detaje për këto gara.

Nikçi ka treguar se pjesëmarrës në këtë festë do të jenë shqiptarë nga të gjitha trojet etnike shqiptare dhe nga diaspora.

Anëtari i Këshillit Organizativ ka thënë se për fat të keq në të kaluarën ka pasur shumë më tepër disiplina, duke përfshirë ngasjen e kuajve, apo kijeve por sipas tij këtë vit lojërat do të jenë të ndara në shtatë disiplina atraktive.

“Deri më tani janë lajmëruar 150 garues, por presim që të jenë rreth 300 garues”, tha ai, përcjell Telegrafi.

Nikçi ka thënë se të gjitha lojërat do të përcillen edhe me muzikë e valle tradicionale të këtyre trevave.

Anëtari i Këshillit Organizativ ka shtuar se në Drelaj në një shkollë fillore kohë pas kohe zhvillohen ligjërata dhe trajnime për këto lojëra kaq të vjetra me vlera.

“Besoni se për “gujzën” më kanë pyetur edhe nga një shtet i Amerikës, sepse dëshirojnë ta vendosin si garë në vendin e tyre. Këto lojëra kanë qenë atraktive për rininë”.

Ai thotë se pavarësisht se në fillim nxënësit po kanë rezerva ndaj këtyre lojërave, më pas ato po i pranojnë dhe luajnë me kënaqësi.

“Kam shpresë që këto lojëra do të vazhdojnë edhe në të ardhmen dhe nuk do të zhduken”, shprehet më tej Vesel Nikçi./Telegrafi/