Mustafa: Serbët e dinin se Zahiri nuk zihet i gjallë e as nuk dorëzohet

Zahir Pajaziti dhe dy shokët e ngushtë të tij, Hakif Zejnullahu e Edmond Hoxha, u vranë më 31 janar 1997 në Pestovë të Vushtrrisë, pasi u zunë në pritë nga policia serbe.

Ish- komandanti i Zonës operative të Llapit, Rrustem Mustafa i njohur me nofkën “Remi” thotë se shumë shokë të Zahirit dy javë më parë kishin rënë në burg.

Por sipas tij ata e dinin se Zahiri nuk mund të kapet i gjallë.

“Policia serbe e dinte se Zahiri ishte person që nuk mund të kapej. E dinin se ai nuk dorëzohej i gjallë. Ata i kanë vënë prit më mjete të rënda madje janë angazhuar edhe helikopterë. Është bërë luftim i hapur dhe ka rënë komandanti Zahir Pajaziti dhe bashkëluftëtarët e tij Edmond Hoxha dhe Hakif Zejnullahu”, tha Mustafa në RTV Dukagjini.

Remi thotë se Serbia ka përdorur të gjitha instrumentet e mundshme për të kapur Zahir Pajazitin, përcjell Telegrafi.

Mustafa thotë se të gjitha aksionet kundër policisë serbe që ishin marrë përsipër në atë kohë ishin të UÇK-së.

Ish-komandanti i Zonës Operative të Llapit thotë se më rënien e Zahir Pajazitit për një kohë aksionet në gjithë vendin kanë rënë.

“Më pas filloi edhe lufta frontale ndaj pushtuesve”, tha ndër të tjera Mustafa./Telegrafi/