Muhaxhiri: TVSH-ja për librin në Kosovë më e larta në rajon

Blerim Muhaxhiri, drejtor menaxhues i Librarisë “Dukagjini” ka thënë se taksat mbi librin janë barrë e madhe për botuesit, autorët dhe për libraritë.

“Është e padrejtë e madhe dhe peshë shumë e rëndë për librin, duke filluar nga shkrimtari, te botuesi e deri te libraria që e shet në fund librin”, ka thënë Muhaxhiri, duke shtuar se nuk e di cili është përfitimi i shtetit me këtë taks, kur gjendja ekonomike e popullit nuk është e mirë, dhe se kjo e pengon edhe hapjen e librarive të reja, përcjell Telegrafi.

Muhaxhiri në emisionin “Përballje” me gazetarin Muhamet Hajrullahu, ka krahasuar taksat e Kosovës me vendet e rajonit.

“Për librin e huaj,  Shqipëria e ka taksën zero, ndërsa te na në Kosovë, libri e ka taksën 8 për qind, por kur kanë ilustrime, që zakonisht janë librat e fëmijëve,  janë të ngarkuar me doganë 18 për qind doganë, plus 8 për qind tatim mbi vlerën e shtuar (TVSH)”, është shprehur drejtor menaxhues i Librarisë “Dukagjini”.

Muhaxhiri ka shpjeguar pse libri i njëjtë në Kosovë mundë të kushtojë më shtrenjtë se në Shqipëri.

“Nëse fatura ka vlerë 1 euro ose 1 milion euro, ne i paguajmë 130 deri 150 euro, procedurë doganore pa përfshirë edhe TVSH-në”, ka shtuar më tej Muhaxhiri, duke thënë për shkak të këtyre taksave dhe proceduarave, libri i njëjtë në Kosovë detyrohet të shitet për rreth një euro më shtrenjtë se në Shqipëri./Telegrafi/