MPB: Në aksidentin në Prishtinë ishte e përfshirë vetura e MPB, por nuk ishte i pranishëm ministri Mustafa

Ministria e Punëve të Brendshme përmes një komunikate për media ka sqaruar se në një aksident trafiku në lagjen ‘Arbëria’ në Prishtinë, ku ishin të përfshira dy vetura, njëra prej tyre ishte e kësaj ministrie, por nuk ka qenë ministri i Punëve të Brendshme, Ekrem Mustafa.

MPB njofton se në aksidentin në lagjen “Arbëria” njëra nga dy veturat e përfshira në aksident është e MPB-së, por në veturë nuk ka qenë ministri Mustafa por katër zyrtarë të kabinetit të ministrit.

Lexoni të plotë reagimin e MPB-së:

“Reagim në lidhje me raportimet në media për aksidentin ku është e përfshirë edhe një veturë e Ministrisë së Punëve të Brendshme.

Ministria e Punëve të Brendshme ju njofton se sot rreth orës 09:00 në një aksident trafiku në lagjen Arbëria në Prishtinë, njëra nga dy veturat e përfshira në aksident është e MPB-së. Në këtë veturë kanë qenë 4 zyrtarë të kabinetit të ministrit Mustafa.

Ju njoftojmë që në veturën në fjalë nuk ka qenë ministri i Punëve të Brendshme, z.Ekrem Mustafa.

Duke i falënderuar mediet për bashkëpunimin, kërkojmë nga to që në raste të tilla të merret edhe një konfirmim zyrtar nga Ministria e Punëve të Brendshme”. /Telegrafi/