Mirëqenia në Maqedoni, sa një e treta e BE-së

Një i punësuar në Maqedoni me pagë mesatare prej 360 euro i paguan prodhimet dhe artikuj ushqimorë gati me çmim të njëjtë sa një i punësuar në Austri, i cili merr pagë mesatare prej 1500 eurove. Përkundër asaj se qytetarët në Maqedoni më lirë se në Austri i paguajnë një pjesë të prodhimeve, megjithatë krahasimi i standardi jetësor mes dy shteteve si dhe dallimi prej gati katër herë në paga, tregon se ne kemi fuqi shumë më të dobët blerëse se të gjitha shtetet Perëndimore. Këtë e tregon krahasimi i kostos së një pjese të produkteve ushqimore në tregun vendor me tregun austriak. Kjo me fjalë të tjera nënkupton se kur maten të ardhurat e një qytetari në Maqedoni me nivelin e çmimeve, del se me këto të ardhura mund të blihen shumë më pak shërbime dhe të mira materiale në raport me Austrinë, njofton gazeta KOHA.

Mirëqenien dëshpëruese të qytetarëve tanë e dëshmon edhe fakti se për dallim prej shumicës së shteteve perëndimore, ku harxhimet e ndryshme jetësore janë më të mëdha se në Maqedoni, atje harxhimet janë të harmonizuara me pagat mujore dhe lejojnë jo vetëm kënaqjen e nevojave mujore, por edhe shkuarjen në pushime, blerjen e veturës dhe gjësendeve të tjera të nevojshme si dhe kursim të caktuar përgjatë një muaji. Ndërkaq, krahasimi i prodhimeve të ndryshme tregon se në Maqedoni një litër qumësht kushton deri në 60 denarë, kurse çmim i njëjtë është edhe në Austri. Gjashtë vezë në Maqedoni kushtojnë 50 denarë kundrejt 70 denarë në Austri. Krahasimi i çmimeve më tej tregon se në Maqedoni një bukë kushton 20-32 denarë, në raport me 90 denarë në Austri. Një kilogram mish pule në Maqedoni është 180 denarë , ndërsa në Austri është 300 denarë. Gjashtë kilogram detergjent në Maqedoni është 420-520 denarë, kundrejt 600 denarë në Austri. Cigaret në Maqedoni kushtojnë 70 denarë, kundrejt 300 denarë në Austri. Një kilogram banane në Maqedoni kushton 60-70 denarë kundrejt 80-180 denarë në Austri. Gjysmë kilogram mish i bluar në Maqedoni është 120 denarë, ndërsa në Austri është 180 denarë.

Sipas profesorit universitar, Neritan Turkeshi, mirëqenien e dobët të qytetarëve në Maqedoni e dëshmojnë edhe të dhënat statistikore, sipas të cilave standardi jetësor i një qytetari në Maqedoni në mesatare është sa një e treta e një banori në BE. “Gjatë krahasimit të standardit jetësor midis shteteve të ndryshme, si tregues merret Prodhimi i Brendshëm Bruto për kokë banori i përshtatur për paritetin e fuqisë blerëse. Kjo do të thotë se të ardhurat mesatare të një qytetari krahasohen me nivelin e çmimeve në shtet, që të mund të krahasohet se sa shërbime dhe të mira tjera materiale mund të blihen me ato të ardhura. Me fjalë të tjera, një matës i tillë tregon se mirëqenia e qytetarëve të Maqedonisë është diku një e treta e asaj të një qytetari mesatar të BE-së”, thotë profesori universitar Neritan Turkeshi. Sipas tij, në Austri si dhe shumicën e shteteve perëndimore, harxhimet e ndryshme jetësore janë të harmonizuara me pagat mujore. Gjithashtu, edhe një pjesë e madhe e prodhimeve që shiten tek ne janë më pak cilësore se në shtetet perëndimore, ndërsa një pjesë e shërbimeve akoma kanë monopol të heshtur, që si dukuri, vështirë tejkalohen, shton më tej Turkeshi. Për mirëqenien e dobët të qytetarëve në Maqedoni flet edhe fakti se blerja e ushqimit paraqet harxhimin më të madh në buxhet, për të cilin harxhohet mbi 42 për qind e të ardhurave mujore, ndërsa në shtetet e zhvilluara kjo përqindje lëviz prej 10-15 për qind. Kur kësaj i shtohet edhe fakti se veshmbathja cilësore, si këpucët, këmishët, pantallonat e brenduara e kështu me radhë, në Maqedoni shiten shumë më shtrenjtë se në Perëndim, atëherë fitohet një pasqyrë e zymtë e cilësisë së jetesës në vend. /Telegrafi/