“Solidaritet i plotë me Kosovën”, Gjermania dënon sulmin terrorist: Përgjegjësit të dalin para drejtësisë

Ministria e Punëve të Jashtme të Gjermanisë e kanë dënuar ashpër sulmin terrorist në kanalin e Ibër – Lepencit, sulm ky i cili rrezikoi furnizimin me ujë dhe energji elektrike për qindra mijëra qytetarë të Kosovës.

Ministria e Punëve të Jashtme e Gjermanisë është solidarizuar me Kosovën, duke kërkuar që përgjegjësit të dalin para drejtësisë.

“Gjermania bashkohet me Bashkimin Evropian në dënimin më të ashpër të sulmit terrorist të djeshëm ndaj infrastrukturës kritike të Kosovës. Solidaritet i plotë me Kosovën. Ata që janë përgjegjës duhet të dalin para drejtësisë”, thuhet në reagimin e postuar në platformën “X” , transmeton Telegrafi.

Germany joins @eu_eeas in condemning in the strongest terms yesterday’s terrorist attack on #Kosovo’s critical infrastructure. Full solidarity with 🇽🇰. Those responsible must be held accountable. https://t.co/lwjLMbCdTx

— GermanForeignOffice (@GermanyDiplo) November 30, 2024

Edhe Michael Roth, kryetari i Komitetit për Çështjet e Jashtme të Parlamentit të Gjermanisë, ka dënuar fuqishëm sulmin e fundit në kanalin e ujit Ibër-Lepenc në Kosovë, duke e quajtur atë një “akt terrorist”.

Bashkimi Evropian (BE) e ka cilësuar si sulm “terrorist” si dhe akt “sabotues” shpërthimin e së premtes në kanalin e Ibër-Lepencit në veri të Kosovës, i cili rrezikoi furnizimin me ujë dhe energji elektrike për qindra mijëra qytetarë të Kosovës.

Përmes një mesazhi në platformën X, Roth theksoi se metoda e përdorur në sulm ishte në përputhje me terrorizmin në stilin rus.

“Këto janë metoda terroriste ruse kundër një shteti sovran në zemër të Evropës”, tha Roth.

“Këto sulme duhet të hetohen në thellësi. Nëse Serbia vërtet është pas kësaj, gjë që shpresoj të mos jetë, kjo do të shënonte fundin e negociatave të BE-së me Serbinë”, pohoi deputeti gjerman.

Gjatë ditës Policia e Kosovës ka arrestuar tetë të dyshuar dhe kanë konfiskuar armatim, pas një operacioni të gjerë në veri në lidhje me shpërthimin në kanalin e Ibër-Lepencit.

Drejtori i Policisë, Gazmend Hoxha, ka thënë se gjatë sulmit në Ibër-Lepenc janë përdorur sasi të konsiderueshme e eksplozivit nga 15-20 kilogram.

Sipas tij, se në bazë të hetimeve deri tash “kemi të bëjmë me një grup mirë të organizuar”. /Telegrafi/