Meta mbështet Kurtin pas pranimit të propozimit të BE-së: Përshëndes lidershipin e kryeministrit

Ish-Presidenti i Shqipërisë, Ilir Meta, tashmë kryetar i partisë së Lirisë, ka përshëndetur sot qëndrimin e Kryeministrit të Kosovës, Albin Kurti për pranimin e propozimit të Bashkimit Evropian për normalizimin e marrëdhënieve me Serbinë.

Në një postim në Twitter, Meta është shprehur se propozimi i BE-së është një faktor kyç për stabilitetin dhe të ardhmen evropiane të rajonit.

“Një lajm shumë i mirë nga Prishtina për hapat pozitivë drejt njohjes reciproke dhe normalizimit të marrëdhënieve ndërmjet Kosovës dhe Serbisë. Përshëndes lidershipin e kryeministrit Albin Kurti, që kontribuon për paqe të qëndrueshme dhe marrëdhënie të mira me fqinjët. Propozimi i BE-së, një faktor kyç për stabilitetin dhe të ardhmen evropiane të rajonit”, ka shkruar Meta.

Pas një takimi me dërguarin special të BE-së Miroslav Lajçak ditën e djeshme, Kurti në një postim në Twitter ka shkruar se Kosova e pranon propozimin e BE-së për normalizimin e marrëdhënieve mes Kosovës dhe Serbisë.

“Shkëmbim i mirë me të dërguarin special të BE-së Miroslav Lajçak gjatë një drekë pune në Prishtinë. Ne e pranojmë propozimin e BE-së për normalizimin e marrëdhënieve ndërmjet Kosovës dhe Serbisë dhe e konsiderojmë atë një bazë të mirë për diskutime të mëtejshme dhe një platformë solide për të ecur përpara”, ka shkruar Kurti.

Kurti thotë se ka pyetje të rëndësishme rreth këtij plani e të cilar do t’i adresojë në Bruksel.

“Pyetje të rëndësishme mbi garancën ndërkombëtare, mekanizmat zbatues dhe periudhën kohore do të adresohen së shpejti në bisedimet në Bruksel. Konceptet demokratike të orientimit evropian na japin shpresë”, ka shkruar Kurti.

Ndërkaq, emisari i BE-së, Miroslav Lajçak pas takimit me kryeministrin para mediave tha se arsyeja e ardhjes së tij në Kosovë është çështja e planit evropian si dhe Asociacioni.

I pyetur për çështjen e themelimit të Asociacionit të komunave me shumicë serbe ai tha se tashmë është e ditur se gjithçka që është nënshkruar, duhet të zbatohet. /Telegrafi/

1/2 Një lajm shumë i mirë nga Prishtina për zhvillimet pozitive mbi njohjen reciproke dhe normalizimin e marrëdhënieve ndërmjet Kosovës dhe Serbisë. Përshëndes lidershipin e kryeministrit @albinkurti që kontribuon për paqen e qëndrueshme dhe marrëdhëniet e mira me fqinjët. https://t.co/9KOv4SMIiP

— Ilir Meta (@ilirmetazyrtar) February 7, 2023