Mësohet shkaku i vdekjes së Dolores O’Riordan: Këngëtarja e “The Cranberries” u mbyt në vaskë pas helmimit me alkool

Një hulumtim i realizuar në Londër ka treguar se Dolores O’Riordan ishte mbytur në vaskë pas helmimit me alkool.

Në janar të këtij viti, këngëtarja e grupit irlandez, “The Cranberries”, u gjet e vdekur në një hotel në kryeqytetin britanik.

Nga të dhënat e para të ekspertizës mjeko-ligjore u tha se ajo kishte pirë një sasi të madhe alkooli dhe se vdekja e saj ishte një fatkeqësi.

Më herët ishte theksuar se O’Riordan nuk kishte lënë asnjë letër lamtumirëse, si dhe nuk ka pasur asnjë gjurmë të vetëlëndimit.

Lexo po ashtu Lajmet për Dolores

Gjatë këqyrjes së së vendit të ngjarjes, janë gjetur shishe të zbrazëta dhe barna që ajo i kishte me recetë.

Dolores ka pasur probleme shëndetësore me shpinën dhe për këtë arsye në vitin 2017 e kishte anuluar turneun në Evropë dhe Amerikën veriore. Veç kësaj, ajo ishte e diagnostikuar me çrregullim bipolar (psikozë maniako-depresive).

Çrregullimi bipolar (që njihet edhe si sëmundja maniako-depresive) është një çrregullim mental që shkakton lëvizje të pazakonshme në disponim, energji, nivele të aktivitetit dhe aftësisë për t’i kryer obligimet e zakonshme ditore.

Në fund të vitit të kaluar kishte shkruar në Twitter se është në gjendje të mirë shëndetësore dhe planet për vitin 2018 ishin që të niste një turne në Irlandë.

Me vdekjen e Dolores O’Riordan, bota e humbi një artiste të vërtetë. Muzikantja irlandeze me origjinë nga Limerick ndërroi jetë në moshë 46-vjeçare. Ajo ka lënë pas vetes tri vajza.

“The Cranberries” ishte një grup shumë i suksesshëm i viteve të nëntëdhjeta, ndërsa kanë realizuar shumë hite, në mesin e tyre “Animal Instinct”, “Linger” e “Zombie”. /Telegrafi/