Maqedoni, propozohen ndryshime ligjore për hapjen e procedurave për personat nga “lista e zezë” e SHBA-së

Trupi Koordinues për Analizën dhe Forcimin e Legjislacionit në Luftën Kundër Korrupsionit dhe Krimit të Organizuar ka mbajtur sot një mbledhje për të shqyrtuar mundësinë e forcimit të masave kufizuese në lidhje me listën e sanksioneve të Shteteve të Bashkuara të Amerikës.

Siç kumtoi shërbimi për shtyp i Qeverisë, Propozimi për ndryshime në Ligjin për Masa Kufizuese është iniciuar nga zëvendëskryeministrja përgjegjëse për Politika të Qeverisjes së Mirë, Sllavica Gërkovska, për të mundësuar sanksionet e vendosura nga Shtetet e Bashkuara të Amerikës, të cilat i referohen korrupsionit, krimit të organizuar, terrorizmit dhe kërcënimeve hibride, të mund të aplikohen në vend dhe subjektet e mbuluara t’i nënshtrohen sanksioneve sipas legjislacionit të brendshëm.

“Të pranishmit ranë dakord për nevojën e përgatitjes së një zgjidhjeje efektive që do të zgjerojë fushën e listës së sanksioneve dhe do të plotësojë ligjin me një procedurë në bazë të së cilës sanksionet e vendosura nga Shtetet e Bashkuara të Amerikës do të përpunohen në legjislacionin tonë”, thuhet në kumtesë.

Nga Qeveria theksojnë se mbështetja e Shteteve të Bashkuara të Amerikës si aleate e dëshmuar e Republikës së Maqedonisë së Veriut është e një rëndësie të madhe, si dhe përpjekjet e qeverisë amerikane për promovimin e paqes, stabilitetit dhe qeverisjes funksionale demokratike në rajon.

“Trupi koordinues konkludoi që pas konsolidimit të komenteve dhe propozimeve nga anëtarët që u diskutuan në seancën e sotme, propozimi për ndryshime në Ligjin për Masat Kufizuese të dorëzohet në Qeveri dhe të shqyrtohet dhe miratohet në njërën nga seancat e ardhshme”, thuhet në kumtesë.