Magjistralja Tetovë-Gostivar do të bëhet me tre korsi

Magjistralja Tetovë-Gostiva do të bëhet me tre korsi në një drejtim, njoftoi drejtori i NP “Rrugët Shtetërore”, Zoran Kitanov i cili inspektoi punët ndërtimore në rekonstruimin e pjesës rrugore nga Tetova deri në Kodrën e Diellit. Shkak për zgjerimin e magjistrales Tetovë-Gostivar është frekuentimi i lartë i automjeteve.

“Pjesa A2 Tetovë-Gostivar është shumë e ngushtë. Është dorëzuar detyra projektuese e Fakultetit të Ndërtimtarisë ku ka dy zgjidhje alternative. Të dyja janë shumë të mira dhe me standard të lartë të magjistrales, por do ta them vetëm njërën. Sipas kësaj zgjidhje korsitë do të jenë të gjera 3.75 metra dhe 2.5 metra”, tha Kitanov.

Ai paralajmëroi rekonstruimin e tërësishëm të pikë pagesave në Korridorin 8 dhe vendosjen e pagesave elektronike. Në rajonin e Tetovës përveç rrugës Tetovë-Kodra e Diellit do të rekonstruhohen edhe pjesë tjera të rrugëve.

Ai tha se është përfunduar rekonstruimi i rrugës Pirok-Bogovin-Vrapçisht ku janë investuar 15 milionë denarë./Telegrafi/