Lluka: Privatizimi është forma e duhur për ta mbajtur Telekomi në një gjendje të mirë

Ministri i Zhvillimit Ekonomik, Valdrin Lluka, në seancën e jashtëzakonshme të Kuvendit të Kosovës, tha se Telekomi duhet të privatizohet në mënyrë që kompania të dal nga kjo gjendje në të cilën është.

Lluka ka shtuar se çdo ndërhyrje politike në Telekom rrezikon një arbitrazh të dytë.

“Sa i përket mendimit tim si qeveri, ne e kemi shumë të qartë që hapat e ardhshëm janë ristrukturimi, rritja e vlerës dhe privatizimi. Unë mendoj që privatizimi është forma e duhur, si çdo shtet tjetër i zhvilluar, për ta mbajtur një ndërmarrje si Telekomi në një gjendje të mirë. Privatizimi do të thotë se ne do të mbetemi aksionar në një shumë të konsiderueshme të aksioneve, prej 25-49 për qind, por pjesa e vendimmarrjes prej 51 për qind duhet të privatizohet. Çdo ndërhyrje politike e drejtpërdrejt e rrezikon një arbitrazh të dytë të mundshëm ku ne jemi shumë të pambrojtur, prandaj është shumë me rëndësi që t’i bëjmë detyrat tona në shtëpi”, ka thënë Lluka.

Ai ka treguar se Telekomit duhet t’i bëhet një ekspertizë financiare dhe një mendim ligjor.

“Sa i përket raportit me Telekomin dhe Dardafonin, janë dy gjëra kryesore që përcaktojnë të ardhmen. E para duhet të bëhet një ekspertizë, që është në kontraktim e sipër nga katër kompani financiare kryesore në botë, që do të bëhet një matricë financiare për dëmin apo jodëmin financiar që kontrata shkakton. E dyta, një mendim ligjor me ekspertë të jashtëm, të cilët përfundimisht do ta japin një mendim ligjor. Këto dy dokumente kryesore do ta vendosin të ardhëm në mes Telekomit dhe Z-Mobile”, ka treguar ai. /Telegrafi/