Liga Saudite ndryshon strategjinë e transferimeve, kjo mund të joshë Salah të pranojë ofertën e tyre

Liga Saudite tashmë ka ardhur me një strategji të re sa i përket transferimeve, vendim ky që mund të ketë një impakt për transferimin e Mohamed Salah në një të ardhme të afërt.

Liverpooli pritet të bëjë ndryshime të mëdha në verë duke marrë parasysh njoftimin e Jurgen Klopp për largim nga klubi në fund të sezonit.

Largimi i pashmangshëm i gjermanit ka bërë që e ardhmja e yjeve të Liverpoolit si Salah, Van Dijk dhe Alexander-Arnold të mbetet në dyshim, me treshen që kanë vetëm edhe 18 muaj të mbetur në kontratat e tyre.

E ardhmja e Salah veçanërisht ka shkaktuar frikë tek tifozët e klubit, pasi egjiptiani kishte marrë një ofertë në vlerë 150 milionë euro nga Al-Ittihadi verën e kaluar.

Ajo ofertë u refuzua menjëherë, por Liga Saudite nuk ka hequr dorë nga transferimi i tij dhe pritet të bëjnë një tjetër ofertë për 31-vjeçarin.

Sidoqoftë, The Athletic raporton se ndryshimi i strategjisë së transferimeve në Arabi, mund të ndikojë në vendimin e Salah.

Lexo po ashtu Publikohen emrat e tre lojtarëve që cilësohen si transferimet më të mira të Klopp te Liverpooli

Raporti shton se këtë verë klubet saudite do të fokusohen për të transferuar më shumë lojtarë që janë në rritje e sipër, apo që janë në kulmin e karrierës, dhe jo lojtarë që janë në përfundim të karrierës.

Natyrisht, Salah ende është në kulmin e formës së tij pasi ka shënuar 14 gola dhe ka dhuruar tetë asistime në 20 ndeshje të Ligës Premier këtë sezon.

Jo shumë kohë më parë, drejtori i futbollit të Ligës Saudite, Michael Emenalo, pati thënë se dera është e hapur për Salah që të transferohet në Arabi dhe se synimi i tyre është që lojtar si ai të vijnë në Lindjen e Mesme./Telegrafi/