Napoli po shkëlqen në Serie A dhe në Ligën e Kampionëve, ku mbrëmë mundën Ajaxin me rezultat 4-2 në kuadër të xhiros së katërt të fazës së grupeve në stadiumin ‘Maradona’.
Ata siguruan një vend në fazën e eliminimit direkt, duke e konfirmuar sezonin e mirë që po e kalojnë.
Një tjetër ndeshje të madhe bëri gjeorgjiani sensacional Khvicha Kvaratskhelia, i cili në minutën e 16-të i asistoi Giacomo Raspadorit për 2-0, ndërsa në minutën e 62-të shënoi vet nga pika e bardhë për 3-1.
Për ecurinë e tij fantastike vazhdojnë të shkruajën mediat e njohura, ndërsa tani atij i është përkulur edhe UEFA.
"Kvaradona" u shkrua në faqet zyrtare të Ligës së Kampionëve, për ndeshjen që po zhvillonte ylli i ri i Napolit.
Ky është pseudonimi i sulmuesit fantastik gjeorgjian të Napolit, për të cilin UEFA aludon se Napoli më në fund ka një lojtar, aftësitë e të cilit ngjajnë me legjendarin argjentinas Maradona.
Khvicha Kvaratskhelia ka shtatë gola dhe shtatë asistime këtë sezon me fanellën e Napolit.
Skuadra e Napolit nuk di ende për humbje edhe pas 13 ndeshjesh, ndërsa në verë iu larguan disa nga lojtarët kryesor si Lorenzo Insigne, Kalidou Kolibaly, Dries Mertens e Fabian Ruiz. /Telegrafi/
