Lejet e fabrikës së Tesla në Meksikë janë pothuajse gati, teksa shteti nis punën në infrastrukturë

Lejet përfundimtare për Tesla për të ndërtuar një fabrikë të veturave elektrike në shtetin verior meksikan të Nuevo Leon mund të jenë gati brenda javësh dhe qeveria lokale po fillon punën e infrastrukturës të kërkuar nga kompania, tha një zyrtar i lartë të enjten.

Tesla në mars bëri publike planet për të hapur një fabrikë të madhe në Nuevo Leon, e para në Meksikë, e cila ka tërhequr gjithashtu investime edhe nga prodhuesit e tjerë të automjeteve që kërkojnë të përmbushin objektivat ambicioze të prodhimit. Kompania nuk ka dhënë detaje mbi ndërtimin apo prodhimin.

Ministri i Ekonomisë i Nuevo Leon, Ivan Rivas, në një intervistë tha se prodhuesi i veturave i drejtuar nga miliarderi Elon Musk po konsideron një fabrikë më të madhe se sa ishte parashikuar fillimisht dhe ende po harton planet e projektimit, arkitekturës dhe inxhinierisë, raporton Reuters, përcjell Telegrafi.

Qeveria federale është në rrugën e duhur për të dhënë miratimet mjedisore brenda javësh, deklaroi ai, gjë që do të lejojë prodhuesin e veturave elektrike të fillojë ndërtimin.

“Unë pres që të jetë një çështje që do të marrë një kohë prej afro dy javë, maksimumi deri një muaj”, shtoi Rivas.

Rivas bëri të ditur se vetëm Tesla mund të adresojë afatin e saj kohor për Meksikën. Por ai tha se priste që prodhimi të fillonte shumë më herët se 2026 ose 2027, datat që raportoi gazeta meksikane Reforma muajin e kaluar, sepse Nuevo Leon synonte të vendoste shpejt infrastrukturën për ujë, energji elektrike dhe transport.

“Ne po punojmë që kjo të ndodhë shumë shpejt, kështu që ata kanë të gjithë infrastrukturën që u nevojitet për të filluar sa më shpejt të jetë e mundur”, tha ndër të tjera Ivan. /Telegrafi/