Lazio i jep shkollë Milanit të përforcuar, e mposht me rezultat të thellë në derbin e javës (Video)

Lazio ka fituar me rezultat të thellë 4-1 ndaj Milanit në ndeshjen derbi të javës së tretë të kampionatit italian, Serie A.

Skuadra e Simone Inzaghit po përjeton formë të mirë në këtë fillim sezon, pasi ka arritur të mposht Milanin pas një super ndeshje të treguar në stadiumin Olimpico të Romës.

Pjesa e parë e takimit ishte e barabartë për nga loja e treguar, por Lazio shënoi dy gola me anë të sulmuesit të saj Ciro Immobile, i cili shënoi fillimisht në minutën e 38 për 1-0, ndërsa për 2-0 shënoi katër minuta më vonë pas asistimit të Senad Lulic dhe dërgoi skuadrat në pushim mes dy pjesëve.

Pjesa e dytë nisi furishëm për vendasit nga Olimpico, që arritën të shënojnë edhe dy gola të shpejt për dy minuta.

Fillimisht ishte Immobile, i cili kompletoi het-trikun e tij në minutën e 48 me asistimin e Marco Parolos, ndërsa në minutën e 50 ishte Luis Alberto që ngriti epërsinë në 4-0.

Milani arriti të ngushtoj epërsinë në minutën e 56 me anë të Riccardo Montolivos, që shënoi nga afërsia për 4-1 pas asistimit të Hakan Calhanouglu.

Deri në fund të ndeshjes, pati edhe disa gjysmë raste të tjera për gol, por portat mbeten të paprekura dhe Lazio në fund iu gëzua fitores ndaj Milanit me rezultatin përfundimtar 4-1.

Pas kësaj fitore, Lazio e sheh veten në pozitën e tretë me shtatë pikë dhe javën e ardhshme luan në udhëtim te Genoa, ndërsa Milani renditet në vendin e gjashtë me gjashtë pikë dhe e pret në shtëpi Udinesen. /Telegrafi/

https://www.dailymotion.com/video/x6084vd