Largohet një punëtor, nga ndërmarrja Trepça thonë se shkaktoi dëm mbi 27 mijë euro

Punëtori me inicialet Sh.S., i ndërmarrjes “Trepça” është larguar të hënën nga puna pasi ka kryer shkelje të rendë të detyrave të punës.

Kështu u bë e ditur përmes një njoftimi të postuar nga kjo ndërmarrje në rrjetin social në Facebook, ku ndër të tjera thuhet se ky punëtor i ka shkaktuar dëm financiar ndërmarrjes prej mbi 27 mijë euro.

Tutje thuhet se i njëjti ka qenë recidivist i shkeljeve të rënda të detyrave të punës edhe në disa raste të tjera.

“Me datën 24.02.2025 Komisioni Disiplinor ka mbajtur shqyrtimin publik lidhur me rastin e Sh.S. Pas mbajtjes së shqyrtimit publik Komisioni Disiplinor ka vërtetuar se i njëjti ka kryer shkelje të rendë të detyrave të punës nga neni 10 paragrafi 1 nën paragrafi 1.1, 1.5, 1.13 dhe 1.52 i Rregullores nr.prot: 2906 dt. 30.07.2020 për përgjegjësinë disiplinore dhe materiale të punëtorëve të Trepça Sh.A, për shkak se i njëjti i ka shkaktuar dëm financiar Ndërmarrjes Trepça Sh.A., mbi 27,472.00 euro, dhe i njëjti ka qenë recidivist i shkeljeve të rënda të detyrave të punës dhe në disa raste të tjera e gjithë kjo e bazuar në raportin 983 nga komisionet përkatëse. Andaj, Komisioni disiplinor ka sjellë vendim me nr.prot: 1198 të dt. 24.02.2025 dhe ka shqiptuar masën disiplinore ndërprerja e marrëdhënies së punës për Sh.S”, thuhet në postim. /Telegrafi/