Lansohen tri shërbime të reja elektronike për tatimpaguesit

Ministria e Financave, Punës dhe Transfereve ka lansuar sot tri shërbime të reja elektronike për tatimpaguesit: udhëzuesi interaktiv për obligimet tatimore, kalkulatorët tatimorë si dhe vegla për raportimet online të evazionit tatimor.

Në eventin për prezantimin e këtyre inovacioneve ishin prezent zv.ministri i Financave, Punës dhe Transfereve – Avni Zogiani, drejtori në Zyrën për Rritje Ekonomike në USAID – Dega në Kosovë, Alexander Albertine si dhe zv.drejtori Ekzekutiv në Administratën Tatimore të Kosovës, Ilir Murtezaj.

“Digjitalizimi dhe zvogëlimi i barrës administrative janë disa nga prioritetet tona si MFPT dhe në lidhje me këtë kemi digjitalizuar shumë shërbime. Prezantimi i këtyre veglave digjitale në ATK mundëson shërbime më të qasshme për qytetarët dhe i kontribuon reformimit të brendshëm të ATK-së”, tha zv.ministri Zogiani

Ndërsa, Drejtori në Zyrën për Rritje Ekonomike në USAID deklaroi se “ USAID do të vazhdojë të përkrahë Qeverinë e Kosovës në projekte që synojnë rritjen ekonomike. USAID vlerëson progresin e bërë për të përmirësuar procedurat drejt shërbimeve sa më efikase”.

Zv. drejtori i ATK, Murtezaj deklaroi “veglat digjitale të prezantuara sot rrisin kualitetin e shërbimeve të ofruara për qytetarët”.

Murtezaj gjithashtu falënderoi MFPT – në dhe USAID për përkrahjen e deritanishme.

Në pjesën e dytë të eventit pasoi një diskutim i hapur së bashku me panelistët nga bizneset dhe OJQ – të me theks të veçantë tek digjitalizimi dhe ofrimi i shërbimeve tatimore sa më të lehta dhe efikase për qytetarët.