Kurti në takim me Nikshiq, kërkon që Bosnja dhe Hercegovina ta ratifikojë marrëveshjen e lëvizjes së lirë

Pas takimeve në Presidencën e Bosnjës, kryeministri Albin Kurti u prit edhe nga Kryesuesi i Këshillit të Ministrave të Bosnjës dhe Hercegovinës, Nermin Nikshiq.

Raportet ndërmjet dy vendeve, bashkëpunimi ekonomik, mundësitë e reja dhe mënyrat e rritjes së shkëmbimeve tregtare, kulturore dhe arsimore në njërën anë dhe zhvillimet e fundit në rajon dhe bashkëpunimi rajonal në anën tjetër, ishin temat kyçe të takimit.

Kryeministri e njoftoi Kryesuesin e Këshillit të Ministrave, se nga 1 janari i vitit të ardhshëm, qytetarët e Bonjës dhe Hercegovinës do të mund të udhëtojnë në drejtim të Kosovës me letërnjoftime, siç është paraparë në marrëveshjen e nënshkruar në Berlin në nëntor të vitit 2022, në kuadër të Procesit të Berlinit, thuhet në komunikatë.

Ai bëri thirrje që edhe Bosnja dhe Hercegovina ta ratifikojë këtë marrëveshje sa më parë, në mënyrë që edhe qytetarët e Republikës së Kosovës të mund të udhëtojnë lirshëm me letërnjoftime në drejtim të këtij vendi të Ballkanit Perëndimor.

Në të gjitha takimet e sotme, kryeministri Kurti ishte i shoqëruar nga zëvendëskryeministrja Emilija Rexhepi, ambasadori i Kosovës në Kroaci, përgjegjës edhe për Bosnje dhe Hercegovinë, Martin Berisha dhe stafi i kryeministrit. /Telegrafi/