KRU ‘Prishtina’ njofton për gjendjen në liqenet e Badocit dhe Batllavës, kërkohet kursimi i ujit të pijshëm

Kompania Rajonale e Ujësjellësit “Prishtina” ka njoftuar për gjendjen me ujë në liqenet e Batllavës dhe Badocit.

Sipas KRU-së, gjendja në këto liqene është nën nivelin e kapërderdhjes, përcjell Telegrafi.

“Niveli i ujit në liqenet akumuluese Batllava e Badoci është i kënaqshëm. Liqeni i Batllavës me 0.43 metra nën nivelin maksimal të kapërderdhjes, ndërsa liqeni i Badocit me 2.55 metra nën nivelin e kapërderdhjes”, thuhet në njoftimin e kompanisë.

Po ashtu kompania bënë apel që të kursehet përdorimi i ujit të pijshëm.

“Shpenzimi racional i ujit të pijshëm në këtë periudhë është i domosdoshëm. Uji sot nuk duhet të shfrytëzohet në mënyrë të pakontrolluar, me ç’rast mund t’i zvogëlojmë rezervat e ujit të pijshëm. Roli i ujit është thelbësor për qeniet e gjalla dhe planetin, ai na nevojitet për pije, shtëpi dhe kopshte, por me rëndësi është ta kuptojmë domethënien e përdorimit jo të drejtpërdrejt të ujit si për prodhim, furnizim dhe zhvillim”, përfundon njoftimi. /Telegrafi/